ఏటా కొత్త బీసీ గురుకులాలు

ఈ ఏడాది మరో 15 డిగ్రీ కళాశాలలు: గంగుల

ఈనాడు, హైదరాబాద్‌: రాష్ట్రంలో ఈ ఏడాది నుంచి జిల్లాకొకటి చొప్పున 33 కొత్త బీసీ గురుకుల పాఠశాలలను ఏర్పాటు చేయనున్నామని బీసీ సంక్షేమ శాఖ మంత్రి గంగుల కమలాకర్‌ తెలిపారు. ఇందుకు ప్రతిపాదనలు వెంటనే సిద్ధం చేయాలని అధికారులను ఆదేశించారు. తెలంగాణలో ప్రస్తుతం 281 గురుకులాలు ఉన్నాయని, ఏటా కొత్తవి ఏర్పాటు చేస్తూ వీటి సంఖ్యను రెట్టింపు చేయనున్నట్లు వెల్లడించారు. బుధవారం బీసీ సంక్షేమ శాఖ ముఖ్యకార్యదర్శి బుర్రా వెంకటేశం, గురుకుల సొసైటీ కార్యదర్శి మల్లయ్యబట్టు, స్టడీ సర్కిల్‌ డైరెక్టర్‌ అలోక్‌కుమార్‌, ఉన్నత విద్యామండలి ఛైర్మన్‌ లింబాద్రితో కలిసి మంత్రి సమీక్ష నిర్వహించారు. ఈ ఏడాది నాలుగు పాఠశాలల్ని జూనియర్‌ కళాశాలలుగా అప్‌గ్రేడ్‌ చేయనున్నామని, వచ్చే ఏడాది 115 పాఠశాలల్ని జూనియర్‌ కళాశాలలుగా మార్చుతామని వివరించారు. ప్రస్తుతం ఒకటే బీసీ గురుకుల డిగ్రీ కళాశాల ఉండగా, ఈ ఏడాది మరో 15 ఏర్పాటు చేయనున్నట్లు చెప్పారు. ఏకసంఘంగా ఏర్పడిన ఆరు కులాలకు ఈ నెల 8న ఆత్మగౌరవ భవనాల మంజూరు పత్రాలు అందజేయనున్నట్లు మంత్రి వెల్లడించారు.