సున్నా కాదు.. 44 మార్కులు

తప్పును సరిదిద్దుకున్న ఇంటర్‌ బోర్డు.. ఉత్తీర్ణుడైన విద్యార్థి

ముదిగొండ, న్యూస్‌టుడే: ఇంటర్‌ బోర్డు తన తప్పును సరిదిద్దుకుంది. జూన్‌ 28న వెల్లడైన ఇంటర్‌ ద్వితీయ సంవత్సరం ఫలితాల్లో ఖమ్మం జిల్లా ముదిగొండ విద్యార్థి భద్రి గోపి ఆంగ్లంలో 70, తెలుగులో 90, చరిత్రలో 93, సివిక్స్‌లో 80 మార్కులు సాధించాడు. ఎకనామిక్స్‌లో మాత్రం సున్నా మార్కులు వచ్చినట్లు చూపి ఫెయిల్‌ మెమో జారీ చేశారు. పరీక్షల్లో పలువురు విద్యార్థులకు మిగిలిన అన్ని సబ్జెక్టుల్లో మంచి మార్కులొచ్చినా.. ఒక్క సబ్జెక్టులో ‘సున్నా’ రావడంపై ‘‘ఇంటర్‌ ఫలితాల్లో మళ్లీ తప్పులు’’ శీర్షికన గత నెల 29న ‘ఈనాడు’లో కథనం ప్రచురితమైంది. స్పందించిన ఇంటర్‌ బోర్డు అధికారులు సున్నా మార్కులు వచ్చిన జవాబుపత్రాలను ఉచితంగా పునఃమూల్యాంకనం చేయాలని నిర్ణయించారు. గోపి ఎకనామిక్స్‌ జవాబుపత్రాలనూ పునఃమూల్యాంకనం చేయించారు. అందులో 44 మార్కులు వచ్చినట్లు నిర్ధారణ కావడంతో.. ఉత్తీర్ణత మెమోను బోర్డు వెబ్‌సైట్‌లో ఉంచారు.