బీజీ-4 రకం పత్తి విత్తనం సిద్ధం

ఈనాడు, హైదరాబాద్‌: పత్తిలో కొత్త రకం వంగడం బీజీ-4 రైతులకు అందించడానికి సిద్ధంగా ఉందని బేయర్‌ కంపెనీ ప్రతినిధులు చెప్పారని రాష్ట్ర వ్యవసాయశాఖ మంత్రి నిరంజన్‌రెడ్డి బుధవారం వెల్లడించారు. అమెరికాలోని సెయింట్‌ లూయిస్‌లో బేయర్‌ కంపెనీ సాగుచేసిన పత్తి విత్తన పంటను, కంపెనీ జన్యు పరిశోధన కేంద్రాన్ని మంత్రి, ఎమ్మెల్యేల బృందం మంగళవారం సందర్శించి వివరాలు తెలుసుకుంది. మంత్రి వెంట ఎమ్మెల్యేలు మెతుకు ఆనంద్‌, రవీంద్రనాయక్‌, పెద్ది సుదర్శన్‌రెడ్డి, రాష్ట్ర విత్తనాభివృద్ది సంస్థ ఎండీ కేశవులు తదితరులున్నారు. పత్తి సాగులో పెట్టుబడి వ్యయం తగ్గించడం, ఉత్పాదకత పెంచడం, నూతన సాంకేతికతలను అభివృద్ధి చేసి అధిక సాంద్రతతో పండించే పద్ధతులను అమలుచేస్తున్న అమెరికాలో అధ్యయనం చేస్తున్నట్లు తెలిపారు. తెలంగాణలో ఈ ఏడాది 20 వేల ఎకరాల్లో అధిక సాంద్రత పద్ధతిలో పత్తి సాగు చేస్తున్నందున దాన్ని మరింత ముందుకు తీసుకెళ్లేందుకు ఈ పర్యటన తోడ్పడుతుందని ఆయన వివరించారు.