అమెరికాను తలదన్నేలా రహదారుల అభివృద్ధి

కేంద్రమంత్రి కిషన్‌రెడ్డి

మాదాపూర్‌, న్యూస్‌టుడే: అమెరికాను తలదన్నేలా భారత్‌లో జాతీయ రహదారులను అభివృద్ధి చేసేందుకు కేంద్రం చర్యలు తీసుకుంటోందని కేంద్ర పర్యాటక, సాంస్కృతికశాఖ మంత్రి జి.కిషన్‌రెడ్డి తెలిపారు. 2014కు ముందు దేశంలో 90 వేల కి.మీ. జాతీయ రహదారులు ఉంటే.. గడిచిన 8 ఏళ్లలో మరో 70 వేల కి.మీ. రహదారులను కేంద్రం అందుబాటులోకి తీసుకువచ్చిందన్నారు. శుక్రవారం మాదాపూర్‌ హైటెక్స్‌లో బస్‌, కార్‌ ఆపరేటర్స్‌ కాన్ఫెడరేషన్‌ ఆఫ్‌ ఇండియా (బీఓసీఐ), ఏపీ, తెలంగాణ స్టేట్‌ బస్‌ ఆపరేటర్స్‌ అసోసియేషన్‌ ఆధ్వర్యంలో ‘ప్రవాస్‌ 3.0’ పేరిట ప్రజారవాణా వాహనాల ప్రదర్శన ఏర్పాటు చేశారు. దీనిని కిషన్‌రెడ్డి ప్రారంభించారు. అనంతరం ఆయన మాట్లాడుతూ ‘‘దేశ ప్రగతిలో రోడ్డు కనెక్టివిటీ కీలకాంశం. జాతీయ రహదారులను మెరుగుపర్చడంతో రోడ్డు ప్రమాదాల సంఖ్య తగ్గింది. దేశవ్యాప్తంగా 92 పర్యాటక, ఆతిథ్యరంగ శిక్షణసంస్థలు ఉన్నాయి. వాటిలో హోటల్‌ మేనేజ్‌మెంట్‌ కోర్సుల్లో ట్రావెల్స్‌ అండ్‌ టూరిజంకు సంబంధించిన సిలబస్‌ను ప్రవేశపెట్టేందుకు నిర్ణయం తీసుకున్నాం. విదేశాల్లో ఉన్న రాయబార కార్యాలయాల్లో భారత పర్యాటక కార్యాలయాలను ప్రారంభించనున్నాం. కరోనా కారణంగా టూర్‌ అండ్‌ ట్రావెల్‌ సంస్థలు ఎంతో నష్టం చవిచూడాల్సి వచ్చింది. ఈ సంస్థలు ఎదుర్కొంటున్న సమస్యల పరిష్కరించేందుకు ప్రభుత్వపరంగా చర్యలు తీసుకుంటాం’’అని వివరించారు. వేర్వేరు కంపెనీలు ప్రదర్శనకు ఉంచిన ప్రయాణికుల బస్సులను మంత్రి పరిశీలించారు. 2 రోజులపాటు కొనసాగే ఈ ప్రదర్శనలో వాహన తయారీ కంపెనీలు అత్యాధునిక పరిజ్ఞానంతో రూపొందించిన బస్సులు, మినీ బస్సులతోపాటు ఎలక్ట్రిక్‌ వాహనాలు కొలువుదీరాయి. కార్యక్రమంలో బీవోసీఐ అధ్యక్షుడు ప్రసన్న పట్వర్ధన్‌, ఛైర్మన్‌ జగ్‌దియోసింగ్‌ ఖల్సా తదితరులు పాల్గొన్నారు.