Published : 06 Aug 2022 04:57 IST

మూడేళ్లలో ఎన్‌హెచ్‌ఎం కింద రూ.2,361 కోట్ల విడుదల

ఈనాడు, దిల్లీ: నేషనల్‌ హెల్త్‌ మిషన్‌ కింద తెలంగాణకు 2019-20లో రూ.964.34 కోట్లు, 2020-21 రూ.671.88 కోట్లు, 2021-22 రూ.725.67 కోట్లు కలిపి మొత్తం రూ.2,361.89 కోట్లు విడుదల చేసినట్లు కేంద్ర వైద్యఆరోగ్యశాఖ సహాయమంత్రి భారతీ ప్రవీణ్‌ పవార్‌ తెలిపారు. అలాగే క్షయ నిర్మూలన కోసం రూ.145.9 కోట్లు ఇచ్చినట్లు వెల్లడించారు. శుక్రవారం లోక్‌సభలో ఎంపీ రంజిత్‌రెడ్డి అడిగిన ప్రశ్నకు ఆమె ఈ మేరకు సమాధానమిచ్చారు.

ఎన్‌జేఐఏఐపై ఏకాభిప్రాయం రాలేదు: కిరణ్‌రిజిజు

నేషనల్‌ జ్యుడిషియల్‌ ఇన్‌ఫ్రాస్ట్రక్చర్‌ అథారిటీ ఆఫ్‌ ఇండియా(ఎన్‌జేఐఏఐ) ఏర్పాటుపై ఇటీవల జరిగిన రాష్ట్రాల ప్రధాన న్యాయమూర్తులు, ముఖ్యమంత్రుల సదస్సులో ఏకాభిప్రాయం రాలేదని కేంద్ర న్యాయశాఖ మంత్రి కిరణ్‌ రిజిజు తెలిపారు. అందువల్ల ఆ ప్రతిపాదనను అంగీకరించలేదన్నారు. శుక్రవారం లోక్‌సభలో ఎంపీ అసదుద్దీన్‌ ఒవైసీ అడిగిన ప్రశ్నకు ఆయన ఈ మేరకు బదులిచ్చారు. ‘‘కోర్టుల్లో అవసరమైన వసతుల కల్పన కోసం ఎన్‌జేఐఏఐ ఏర్పాటు చేయాలని భారత ప్రధాన న్యాయమూర్తి నుంచి ప్రతిపాదనలు అందాయి. వీటిని అన్ని రాష్ట్ర ప్రభుత్వాలు, కేంద్రపాలిత ప్రాంతాలకు పంపి అభిప్రాయం కోరాం. ఆ అంశంపై ఏప్రిల్‌ 30న జరిగిన ముఖ్యమంత్రులు, ప్రధాన న్యాయమూర్తుల సదస్సులోనూ చర్చజరిగింది. ఏకాభిప్రాయం కుదరకపోవడంతో ఆ ప్రతిపాదనను అంగీకరించలేదు’’అని రిజిజు తెలిపారు.

ఫ్రైట్ కారిడార్లను మంజూరు చేయలేదు.. సర్వే ప్రారంభం

రైల్వేశాఖ విజయవాడ మీదుగా సాగే రెండు ఫ్రైట్‌ కారిడార్లపై సర్వే, డీపీఆర్‌ తయారీ పనులు మొదలుపెట్టినట్లు రైల్వే మంత్రి అశ్వినీ వైష్ణవ్‌ తెలిపారు. ఖరగ్‌పుర్‌-విజయవాడ(1,115 కేఎం) మధ్య ఈస్ట్‌కోస్ట్‌ కారిడార్‌, విజయవాడ-ఇటార్సీ(975 కిమీ) మధ్య ఉత్తర-దక్షిణ ఉపకారిడార్‌లపై ప్రస్తుతం సర్వే, డీపీఆర్‌ తయారీ పనులు సాగుతున్నట్లు చెప్పారు. అయితే ఈ రెండు ఫ్రైట్‌ కారిడార్లనూ ప్రభుత్వం మంజూరు చేయలేదన్నారు. కొత్త కారిడార్ల మంజూరు నిర్ణయం డీపీఆర్‌లో వెల్లడయ్యే వివరాలు, సాంకేతిక-ఆర్థిక సాధ్యాసాధ్యాలు, ఆర్థిక సుస్థిరత, నిధుల ఏర్పాట్లపై ఆధారపడి ఉంటుందని తెలిపారు. శుక్రవారం రాజ్యసభలో వైకాపా ఎంపీ విజయసాయిరెడ్డి అడిగిన ప్రశ్నకు ఆయన ఈ మేరకు చెప్పారు.

మత్స్యసంపద యోజన కింద తెలంగాణలో 93,203 మందికి లబ్ధి

ప్రధానమంత్రి మత్స్యసంపద యోజన కింద 2020-21, 2021-22లో తెలంగాణ నుంచి 93,203మందికి లబ్ధి చేకూరినట్లు కేంద్ర మత్స్యశాఖ మంత్రి పురుషోత్తం రూపాల తెలిపారు. ఎంపీ లక్ష్మణ్‌ అడిగిన ప్రశ్నకు ఈ సమాధానమిచ్చారు. ఈ రెండేళ్లలో తెలంగాణలో రూ.147.20 కోట్ల విలువైన ప్రాజెక్టుకు ఆమోదం తెలిపి కేంద్ర వాటా కింద రూ.52.13 కోట్లు విడుదల చేశామని చెప్పారు. ఈ పథకం వల్ల చేపల ఉత్పత్తి 2019-20, 2021-22 సంవత్సరాల మధ్య 3లక్షల నుంచి 3.90 లక్షల టన్నులకు చేరినట్లు వెల్లడించారు.
 

Read latest Ts top news News and Telugu News

Follow us on Facebook, Twitter, Instagram, Koo, ShareChat, and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని