పాలిటెక్నిక్‌ ప్రవేశాలకు తుది విడత వెబ్‌ కౌన్సెలింగ్‌

ఈనాడు, హైదరాబాద్‌: పాలిటెక్నిక్‌ కళాశాలల్లో డిప్లొమా కోర్సుల్లో 2022-23 విద్యా సంవత్సరానికి తుది విడత ప్రత్యేక రౌండ్‌ ప్రవేశాలు కల్పిస్తున్నట్లు సాంకేతిక విద్యాశాఖ ఆదివారం ఒక ప్రకటన విడుదల చేసింది. తెలంగాణ పాలీసెట్‌-2022 ప్రవేశ పరీక్షలో అర్హత సాధించిన విద్యార్థులకు అవకాశం కల్పించనున్నారు. వచ్చే నెల ఒకటి నుంచి మూడు వరకు ఐచ్ఛికాలు నమోదు చేసుకోవాలని, రెండో తేదీ నుంచి ధ్రువపత్రాల పరిశీలన చేయనున్నారు. రాష్ట్రంలో 118 ప్రభుత్వ, ఎయిడెడ్‌, ప్రైవేటు కళాశాలలు ఉండగా వాటిలో 28,562 సీట్లకు గానూ 7,853 సీట్లు ఖాళీగా ఉన్నాయి. సీట్ల భర్తీ తదితర అంశాలకు సంబంధించి https://tspolycet.nic.in వెబ్‌సైట్‌ను సందర్శించాలని సాంకేతిక విద్యాశాఖ కమిషనర్‌ నవీన్‌ మిత్తల్‌ తెలిపారు.