తిరుపతికి వెళ్లే రెండు రైళ్ల దారి మళ్లింపు

ఈనాడు, హైదరాబాద్‌: సికింద్రాబాద్‌ నుంచి తిరుపతికి 16, 17తేదీల్లో బయల్దేరి వెళ్లే రెండు రైళ్లను దారి మళ్లించి నడిపించనున్నట్లు దక్షిణ మధ్య రైల్వే తెలిపింది. ఇందులో సెవెన్‌హిల్స్‌ ఎక్స్‌ప్రెస్‌తో పాటు, సికింద్రాబాద్‌-తిరుపతి ఎక్స్‌ప్రెస్‌ కూడా ఉన్నాయి. గుంతకల్లు రైల్వే డివిజన్‌ పరిధిలోని తాటిచెర్ల-జంగాలపల్లి సెక్షన్‌లో డబ్లింగ్‌ పనుల నేపథ్యంలో పలు రైళ్ల రాకపోకలకు అంతరాయం కలగనుందని తెలిపింది. ఇందులో సికింద్రాబాద్‌-తిరుపతి (నం.12770) మధ్య నడిచే సెవెన్‌హిల్స్‌ ఎక్స్‌ప్రెస్‌ను 16న దారి మళ్లిస్తారు. గుత్తి నుంచి రేణిగుంట మీదుగా ఈ రైలు తిరుపతికి చేరుతుంది. సాధారణంగా ఈ రైలు గుత్తి నుంచి ధర్మవరం, పీలేరు, పాకాల మీదుగా తిరుపతికి వెళుతుంది. అదేవిధంగా సికింద్రాబాద్‌-తిరుపతి (నం.12732) ఎక్స్‌ప్రెస్‌నూ 17న దారి మళ్లించి నడిపిస్తారు. గుత్తి నుంచి రేణిగుంట మీదుగా ఈ రైలు తిరుపతికి వెళుతుంది. వికారాబాద్‌, రాయచూరు మీదుగా వెళ్లే ఈ రైలు సాధారణంగా గుత్తి తర్వాత ధర్మవరం, పీలేరు, పాకాల మీదుగా తిరుపతికి చేరుకుంటుంది.