వైద్య పోస్టుల దరఖాస్తులో దిద్దుబాటుకు వెసులుబాటు

ఈనాడు, హైదరాబాద్‌: వైద్య ఆరోగ్య సేవల నియామక బోర్డు(ఎంహెచ్‌ఎస్‌ఆర్‌బీ) ఆధ్వర్యంలో భర్తీ చేయనున్న 969 వైద్యుల పోస్టుల దరఖాస్తుల్లో తప్పులను సరిదిద్దుకోవడానికి అవకాశం లభించింది. గత జూన్‌ 15న నియామక ప్రకటన వెలువడింది. అర్హులైన అభ్యర్థులు ఈ నెల 14న సాయంత్రం 5 గంటలలోపు https://mhsrb.telangana.gov.in వెబ్‌సైట్‌లో దరఖాస్తు చేసుకోవాలి. ఆన్‌లైన్‌లో దరఖాస్తు చేసుకున్న వారిలో కొందరు తమ సమాచారాన్ని తప్పుగా పొందుపర్చారు. తప్పులు దొర్లినట్లుగా అభ్యర్థుల నుంచి ఎంహెచ్‌ఎస్‌ఆర్‌బీకి వినతిపత్రాలొచ్చాయి. స్పందించిన ప్రభుత్వం తప్పులు దిద్దుబాటుకి మరోసారి అవకాశం కల్పించింది. ఈ నెల 14న తుదిగడువు లోగా ఎవరైతే దరఖాస్తు చేసుకుంటారో.. వారికే దిద్దుబాటుకు అవకాశం ఉంటుందని ఎంహెచ్‌ఎస్‌ఆర్‌బీ తేల్చిచెప్పింది. ఈ నెల 17న ఉదయం 10 గంటల నుంచి 24న సాయంత్రం 5 గంటల వరకూ దరఖాస్తుదారులు తమ అధికారిక వెబ్‌సైట్‌ను సందర్శించి తప్పులను సరిదిద్దుకోవచ్చని శుక్రవారం విడుదల చేసిన ఒక ప్రకటనలో ఎంహెచ్‌ఎస్‌ఆర్‌బీ పేర్కొంది.