కిష్టరాయిన్‌పల్లి జలాశయం పనుల అడ్డగింత

నాంపల్లి, న్యూస్‌టుడే: నల్గొండ జిల్లాలో డిండి ఎత్తిపోతల పథకంలో భాగంగా నిర్మితమవుతున్న కిష్టరాయిన్‌పల్లి జలాశయం నిర్మాణ పనులను శనివారం నాంపల్లి మండలం లక్ష్మణాపురం భూ నిర్వాసితులు అడ్డుకున్నారు. ప్రాజెక్టులో భూములు, నివాసాలు కోల్పోతున్న తమకు మెరుగైన పరిహారం ఇవ్వాలని నిర్వాసితులు గతంలో పలుమార్లు అధికారులకు, ప్రజాప్రతినిధులకు విన్నవించారు. ఆందోళనలు నిర్వహిస్తున్నా అధికారులు పోలీసు బందోబస్తు నడుమ పనులు కొనసాగిస్తున్నారు. ఈ క్రమంలోనే శనివారం ప్రాజెక్టు పనులను అడ్డుకోవడంతో పోలీసులు నచ్చజెప్పే ప్రయత్నం చేయగా వారు ససేమిరా అన్నారు. ఇంతలోనే అక్కడికి చేరుకున్న పోలీసుల వాహనాల ఎదుట మహిళా నిర్వాసితులు అడ్డుగా కూర్చొని ఆందోళన చేశారు. అరెస్టు చేయాలంటూ వారు పోలీసులతో వాగ్వాదానికి దిగారు. మర్రిగూడ ఎస్సై వెంకట్‌రెడ్డి కాళ్లు మొక్కుతూ కనికరించాలంటూ ప్రాధేయపడ్డారు. మెరుగైన పరిహారం కోసమే ఆందోళన చేస్తున్నట్లు కన్నీరు పెట్టుకున్నారు. దీంతో అధికారులు శనివారం ప్రాజెక్టు పనులను చేపట్టకుండా నిలిపివేశారు.