సీఈఎస్‌ఎస్‌ ఎన్నికల షెడ్యూలు వివరాలు ఇవ్వండి

ఈనాడు, హైదరాబాద్‌: రాజన్న సిరిసిల్ల జిల్లా కోఆపరేటివ్‌ ఎలక్ట్రిక్‌ సప్లయ్‌ సొసైటీ లిమిటెడ్‌ (సీఈఎస్‌ఎస్‌) ఎన్నికల షెడ్యూలును ఈ నెల 22లోగా సమర్పించాలంటూ ప్రభుత్వానికి బుధవారం హైకోర్టు ఆదేశాలు జారీ చేసింది. 3.5 లక్షలకు పైగా సభ్యులున్న సహకార సంఘం పాలక కమిటీ గడువు ముగిసినప్పటికీ ఎన్నికలు నిర్వహించకుండా గడువు పొడిగిస్తుండటంతోపాటు దీనికి సంబంధించి జారీ చేసిన జీవో 151ను సవాలు చేస్తూ సొసైటీ సభ్యుడు ఎ.కనకయ్య హైకోర్టులో పిటిషన్‌ దాఖలు చేశారు. దీనిపై ప్రధాన న్యాయమూర్తి జస్టిస్‌ ఉజ్జల్‌ భూయాన్‌, జస్టిస్‌ సి.వి.భాస్కర్‌రెడ్డిలతో కూడిన ధర్మాసనం బుధవారం మరోసారి విచారణ చేపట్టింది. ప్రభుత్వం ఎన్నికల షెడ్యూలు సమర్పించాక అన్ని అంశాలను పరిశీలిస్తామంటూ విచారణను ఈ నెల 22కి వాయిదా వేసింది.