నేడు, రేపు ఓ మోస్తరు వర్షాలు

ఈనాడు, హైదరాబాద్‌: బంగాళాఖాతంలో పశ్చిమ మధ్య ఆంధ్రప్రదేశ్‌ తీరంపై గాలులతో ఉపరితల ఆవర్తనం 1,500 మీటర్ల ఎత్తున ఏర్పడింది. మరోవైపు పశ్చిమ, వాయువ్య భారత ప్రాంతాల నుంచి తక్కువ ఎత్తులో తెలంగాణలోకి గాలులు వీస్తున్నాయి. వీటి ప్రభావంతో రాష్ట్రంలో ఆది, సోమవారాల్లో అక్కడక్కడ ఓ మోస్తరు వర్షాలు కురిసే అవకాశాలున్నాయని వాతావరణ శాఖ తెలిపింది. శనివారం ఉదయం 8 నుంచి రాత్రి 8 గంటల వరకూ అక్కడక్కడ వర్షాలు కురిశాయి. అత్యధికంగా పెంబి (నిర్మల్‌ జిల్లా)లో 5.2, ఖాజాగూడ (రంగారెడ్డి)లో 1.9, టీక్యాతండా (నల్గొండ)లో 1.7 సెంటీమీటర్ల వర్షం కురిసింది.