అంతుచిక్కని వ్యాధితో ఆదివాసీల భయాందోళన

దుమ్ముగూడెం, న్యూస్‌టుడే: అంతుచిక్కని వ్యాధి లక్షణాలతో ఆదివాసీల వరుస మరణాలు సంభవిస్తుండడంతో ఛత్తీస్‌గఢ్‌లోని దండకారణ్యంలో భయాందోళనలు నెలకొన్నాయి. ఇటీవలి భారీ వర్షాలతో బీజాపూర్‌, నారాయణపూర్‌ జిల్లాల్లోని ఆదివాసీ పల్లెల్లో రోగాలు విజృంభిస్తున్నాయి. ఈ క్రమంలో రెండు నెలల వ్యవధిలో 39 మంది మృత్యువాత పడ్డారు. ఇంతమంది మృతి చెందడంతో ఛత్తీస్‌గఢ్‌ ప్రభుత్వం అప్రమత్తమైంది. బీజాపూర్‌ జిల్లాలోని ఇంద్రావతి నదీ పరీవాహక ప్రాంతానికి చెందిన 7 గ్రామాల్లో సుమారు 1,200 మంది ఆదివాసీలు అంతు చిక్కని వ్యాధితో బాధ పడుతున్నారు. ఇప్పటి వరకు 39 మంది మృతి చెందగా 50 మంది తీవ్రంగా బాధ పడుతున్నట్టు ప్రభుత్వం ప్రకటించింది.