మింట్‌ మ్యూజియాన్ని అత్యుత్తమంగా తీర్చిదిద్దుతాం

కేంద్ర మంత్రి కిషన్‌రెడ్డి

ఖైరతాబాద్‌, న్యూస్‌టుడే: మింట్‌ మ్యూజియాన్ని దేశంలోనే అత్యుత్తమంగా తీర్చిదిద్దుతామని కేంద్ర మంత్రి కిషన్‌రెడ్డి పేర్కొన్నారు. శనివారం మింట్‌కాంపౌండ్‌లోని మ్యూజియాన్ని సందర్శించిన ఆయన యాదాద్రి లక్ష్మీనర్సింహస్వామి వెండి నాణేలను విడుదల చేశారు. ఈ సందర్భంగా మంత్రి మాట్లాడుతూ.. హైదరాబాద్‌లో 119 ఏళ్ల క్రితం మింట్‌ ప్రారంభమైందని, ఇక్కడ స్టాంపులు, మెడల్స్‌, అనేక రకాల నాణేలు  ముద్రించేవారన్నారు. ఈ తరహా మ్యూజియం దేశంలో మరెక్కడా లేదని.. పురాతన శ్రీరాముడి చిత్రపటం, నిజాం పటాలు ఎన్నో ఉన్నాయన్నారు. విద్యార్థులు, ఉపాధ్యాయులు, నగరవాసులు మ్యూజియాన్ని సందర్శించాలని, అవసరమైన మార్పులు చేసేందుకు సూచనలివ్వాలన్నారు. యాదాద్రి ఆలయానికి ఎంతో చరిత్ర, ప్రాధాన్యం ఉందని, స్వామి వారి నాణేన్ని అద్భుతంగా రూపొందించారని కొనియాడారు. నూతనంగా విడుదల చేసిన నాణెం యాదాద్రిలో అందుబాటులో ఉంటుందని తెలిపారు. కార్యక్రమంలో మింట్‌ అధికారులు శివరామకృష్ణ, జేపీ దాస్‌, రామ్మోహన్‌ తదితరులు పాల్గొన్నారు.