భారతీయ సినీపరిశ్రమకు తెలంగాణ ముద్ర జైరాజ్‌

  రాష్ట్ర కీర్తిని దేశమంతటా చాటారు

నేడు జైరాజ్‌ జయంతి సందర్భంగా సీఎం ఘన నివాళి

ఈనాడు, హైదరాబాద్‌: భారతీయ చలనచిత్ర పరిశ్రమలో అగ్రస్థానానికి ఎదిగి, తెలంగాణ కీర్తిని జాతీయ స్థాయిలో చాటిచెప్పిన గొప్ప నటుడు, కరీంనగర్‌ బిడ్డ దాదాసాహెబ్‌ ఫాల్కే అవార్డు గ్రహీత పైడి జైరాజ్‌ అని ముఖ్యమంత్రి కేసీఆర్‌ కీర్తించారు. సెప్టెంబరు 28న జైరాజ్‌ జయంతి సందర్భంగా సీఎం ఆయనకు ఘనంగా నివాళులర్పించారు. జాతీయ చలనచిత్ర పరిశ్రమకు జైరాజ్‌ సేవలను స్మరించుకున్నారు. ‘‘భారతీయ సినిమా తొలిదశలో ప్రారంభమైన మూకీల నుంచి టాకీల వరకు సాగిన జైరాజ్‌ ప్రస్థానం చిరస్మరణీయం. భారతీయ వెండి తెరపై మొట్టమొదటి యాక్షన్‌ హీరో ఆయనే కావడం తెలంగాణకు గర్వకారణం. బాలీవుడ్‌లో తన నటనాకౌశలంతో పాటు, దర్శకునిగా, నిర్మాతగా రాణించి దాదాసాహెబ్‌ ఫాల్కే అవార్డును అందుకున్నారు. హిందీ, మరాఠీ, బెంగాలీ, పంజాబీ, కొంకణి, గుజరాతీ, మలయాళం తదితర భాషల్లో దాదాపు 300 చిత్రాలకు పైగా నటించారు. తెలంగాణ నుంచి దేశం గర్వించదగ్గ స్థాయికి ఎదిగిన గొప్పవారిలో ఆయన ఒకరు. జైరాజ్‌ సేవలకు గుర్తుగా రవీంద్రభారతిలోని సమావేశ మందిరానికి ‘పైడి జైరాజ్‌ ప్రివ్యూ థియేటర్‌’గా పేరుపెట్టి గౌరవించుకున్నాం. రాష్ట్ర ఏర్పాటు అనంతరం సాంస్కృతిక శాఖ ద్వారా ప్రభుత్వం అందిస్తున్న ప్రోత్సాహంతో తెలంగాణ యువత సినీ పరిశ్రమలోని పలు విభాగాల్లో గొప్పగా రాణిస్తోంది. భవిష్యత్తులో తెలంగాణ సినిమా రంగం మరింతగా పురోగమించాలి’’ అని సీఎం తన సందేశంలో పేర్కొన్నారు.