భూమి రిజిస్ట్రేషన్‌ వివాదం.. మృతదేహంతో ఆందోళన

సదాశివనగర్‌, న్యూస్‌టుడే: కామారెడ్డి జిల్లా సదాశివనగర్‌ మండలం అడ్లూర్‌ ఎల్లారెడ్డి గ్రామానికి చెందిన మున్వర్‌ఖాన్‌(65) అనే వ్యక్తి బుధవారం రాత్రి గుండెపోటుతో మృతి చెందాడు. అయితే.. కోర్టు కేసులో ఉన్న తన భూమిని తహసీల్దార్‌ మరొకరికి రిజిస్ట్రేషన్‌ చేశారన్న మనస్తాపంతోనే మున్వర్‌ఖాన్‌ మృతిచెందాడంటూ ఆయన బంధువులు గురువారం తహసీల్దార్‌ కార్యాలయం ఎదుట మృతదేహంతో ఆందోళన చేపట్టారు. డబ్బులు తీసుకొని అడ్డగోలుగా రిజిస్ట్రేషన్‌ చేశారని ఆరోపించారు. ఆ సమయంలో తహసీల్దార్‌ అందుబాటులో లేకపోవడంతో ఉప తహసీల్దార్‌ సాయిలును నిలదీశారు. 16 ఏళ్లుగా వివాదంలో ఉన్న భూమిని మరో వ్యక్తికి ఎలా రిజిస్ట్రేషన్‌ చేశారని ప్రశ్నించారు. ఏఎస్సై నర్సయ్య అక్కడికి చేరుకుని.. చట్టపరంగా న్యాయం జరిగేలా చూస్తామని చెప్పడంతో బాధితులు ఆందోళన విరమించారు. తహసీల్దార్‌ను ‘న్యూస్‌టుడే’ వివరణ కోరగా.. ధరణిలో పట్టా ఉన్న వ్యక్తి భూమిని ఇతరులకు విక్రయించారని, మున్వర్‌ఖాన్‌ వేసిన కేసును కోర్టు కొట్టేసిందని తెలిపారు. నిబంధనల ప్రకారమే రిజిస్ట్రేషన్‌ చేశానని, ఇందులో ఎలాంటి అక్రమాలు జరగలేదని పేర్కొన్నారు.