ఆహార కల్తీపై కఠినచర్యలు

వైద్య ఆరోగ్యశాఖ మంత్రి హరీశ్‌రావు ఆదేశాలు

ఈనాడు, హైదరాబాద్‌: కల్తీ ఆహారాలతో ప్రజారోగ్యం దెబ్బతింటోందని, దీర్ఘకాలంలో మధుమేహం, అధిక రక్తపోటు, జీర్ణకోశ సమస్యలతో పాటు క్యాన్సర్‌ వంటి ప్రమాదకర జబ్బులకు దారితీస్తుందని వైద్య ఆరోగ్యశాఖ మంత్రి హరీశ్‌రావు అన్నారు. ఆహార పదార్థాలు కల్తీ చేసే వారిపై కఠిన చర్యలు తీసుకోవాలని స్పష్టం చేశారు. ఎక్కడైనా కల్తీ జరిగినట్లు, పదార్థాల్లో నాణ్యత లేనట్లు సమాచారం ఉంటే.. ప్రజలు 040 21111111 నంబరుకు ఫోన్‌ చేయవచ్చని, జీతినీదిబిబీలీది ట్విటర్‌ ద్వారా ఫిర్యాదు చేయవచ్చని సూచించారు. ఆహార పరిరక్షణ విభాగం పురోగతి, లక్ష్యాలపై వెంగళరావునగర్‌లోని భారతీయ ఆరోగ్య కుటుంబ సంక్షేమ కార్యాలయంలో మంత్రి శుక్రవారం ఉన్నతాధికారులతో సమీక్షించారు. ఈ సందర్భంగా మాట్లాడుతూ.. ‘ఆహార పరిరక్షణ విషయంలోనూ తెలంగాణ దేశానికి ఆదర్శంగా నిలవాలి. అధికారులు లేనిచోట జిల్లా వైద్యాధికారులకు ఆహార పరిరక్షణ బాధ్యతలు అప్పగించాలి. టీఎస్‌పీఎస్‌సీ ద్వారా త్వరలో ఖాళీలు భర్తీ చేస్తాం. నెలలో రెండు శనివారాల్లో అనుమతి పత్రాల జారీకి ప్రత్యేక శిబిరాలు నిర్వహించాలి. కోర్టు కేసులు త్వరగా పరిష్కారమయ్యేలా చొరవ చూపి కల్తీ చేసే వారి ఆట కట్టించాలి. నిఘా బృందాలు జిల్లాల్లో ఆకస్మిక తనిఖీలు చేయాలి’ అని మంత్రి ఆదేశించారు.