రాష్ట్రంలో తొలిసారి సహకార సంఘం గృహ రుణం

సుల్తానాబాద్‌, న్యూస్‌టుడే: పెద్దపల్లి జిల్లా సుల్తానాబాద్‌ ప్రాథమిక వ్యవసాయ సహకార సంఘం రాష్ట్రంలోనే మొదటిసారిగా ఓ వ్యక్తికి గృహ రుణం అందజేసింది. దీంతో పాటు కర్షకమిత్ర(పంట, దీర్ఘకాలిక రుణాలు సక్రమంగా చెల్లించేవారికి) రుణాన్ని కూడా మొదటిసారి అందజేశారు. సహకార సంఘం ఆధ్వర్యంలో సుల్తానాబాద్‌లో ఏర్పాటు చేసిన నీటిశుద్ధి కేంద్రం, వ్యాపార సముదాయం శనివారం ఎమ్మెల్యే దాసరి మనోహర్‌రెడ్డితో కలిసి తెలంగాణ రాష్ట్ర సహకార కేంద్ర బ్యాంకు (టెస్కాబ్‌) అధ్యక్షుడు కొండూరి రవీందర్‌రావు ప్రారంభించారు. ఈ సందర్భంగా సుల్తానాబాద్‌ మండలం నీరుకుళ్ల గ్రామానికి చెందిన అంజయ్య అనే రైతు గృహ నిర్మాణం కోసం సహకార సంఘం ఆధ్వర్యంలో రుణానికి సంబంధించిన రూ.25 లక్షల చెక్కును అందజేశారు.