పుట్టెడు దుఃఖంతో.. గారాలపట్టి పుట్టినరోజు

సమాధి వద్ద విలపించిన కన్నపేగు

వెల్గటూరు, న్యూస్‌టుడే: ఆడుతూ పాడుతూ ఆనందంగా గడిపే ఆ చిన్నారిని విష జ్వరం పొట్టనపెట్టుకుంది. నెల రోజుల కిందట తిరిగిరాని లోకాలకు వెళ్లి కడుపుకోత మిగిల్చిన తమ కూతురిని ఆ దంపతులు తలచుకోని రోజంటూ లేదు. గురువారం తమ గారాల పట్టి పుట్టిన రోజు కావడంతో సమాధి వద్ద ఆ చిన్నారి జయంతి నిర్వహించారు. జగిత్యాల జిల్లా వెల్గటూరుకు చెందిన కొప్పుల రాజు, రసజ్ఞ దంపతుల నాలుగేళ్ల కుమార్తె జ్ఞానన్వి గత నెల 8న విష జ్వరంతో మృతి చెందింది. గురువారం ఆమె పుట్టిన రోజు కావడంతో ఆ దంపతులు ఆమెను ఖననం చేసిన చోటికి కేక్‌ను తీసుకొని వెళ్లారు. అక్కడ కేక్‌ కోసి భారమైన హృదయంతో జయంతిని నిర్వహించారు. చిన్నారి జ్ఞానన్వి ఫొటోకు కేక్‌ తినిపిస్తూ తల్లి రోదించిన తీరు అందరినీ కంటతడి పెట్టించింది.