అమ్రాబాద్‌ అభయారణ్యానికి.. ‘యాదాద్రి థర్మల్‌’ ఎంత దూరంలో ఉంది?

కేంద్ర పర్యావరణ శాఖ ఆరా

ఈనాడు, హైదరాబాద్‌: యాదాద్రి థర్మల్‌ విద్యుత్తు కేంద్రానికి ఇచ్చిన పర్యావరణ అనుమతిపై మరోసారి అధ్యయనం చేయాలని కేంద్ర పర్యావరణ శాఖ రాష్ట్ర అటవీ శాఖను ఆదేశించింది. ఈ అధ్యయనాన్ని 9 నెలల్లో పూర్తిచేసి నివేదిక ఇవ్వాలని తాజాగా సూచించింది. విద్యుత్తు కేంద్రం నిర్మించే స్థలం అమ్రాబాద్‌ అభయారణ్యానికి ఎంత దూరంలో ఉంది అన్న అంశాన్ని నిర్ధారించి చెప్పాలని తెలిపింది. పది కి.మీ దూరంలోపు ఉంటే వన్యప్రాణుల సంరక్షణ చట్టం ప్రకారం అనుమతి తీసుకోవాలని స్పష్టం చేసింది. ఈ నెల 2న జరిగిన పర్యావరణ సమీక్ష కమిటీ సమావేశంలో ఈ విద్యుత్తు కేంద్రంపై చర్చించినట్లు తెలిపింది.  రూ.29,965.48 కోట్ల అంచనా వ్యయంతో కూడిన ఈ ప్రాజెక్టులో 61.50 శాతం పనులు పూర్తయ్యాయని కేంద్ర పర్యావరణ శాఖకు జెన్‌కో తెలిపింది.