ఆ మూడు ప్రాజెక్టుల డీపీఆర్‌లపై ఏం చేద్దాం?

ఈఎన్‌సీ, సీఈలతో ప్రత్యేక ప్రధాన కార్యదర్శి సమీక్ష 

ఈనాడు, హైదరాబాద్‌: గోదావరిపై నిర్మిస్తున్న మూడు ప్రాజెక్టుల సమగ్ర ప్రాజెక్టు నివేదిక(డీపీఆర్‌)లకు సాంకేతిక సలహా సంఘం(టీఏసీ) ఆమోదం పొందేందుకు ఎలాంటి చర్యలు చేపట్టాలనే అంశంపై నీటిపారుదల శాఖ కసరత్తు చేస్తోంది. గురువారం జలసౌధలో ఈఎన్‌సీ, సీఈలతో ప్రత్యేక ప్రధాన కార్యదర్శి రజత్‌కుమార్‌ సమీక్ష నిర్వహించారు. ఈ నెల 29వ తేదీన దిల్లీలో కేంద్ర జల సంఘం(సీడబ్ల్యూసీ) నేతృత్వంలో నిర్వహించే సమావేశంలో టీఏసీ ముందుకు చౌట్‌పల్లి హన్మంత్‌రెడ్డి, ముక్తేశ్వర్‌(చిన్న కాళేశ్వరం), చనాకా-కొరాటా ప్రాజెక్టుల డీపీఆర్‌లు పరిశీలనకు రానున్నాయి. ప్రాజెక్టుల నిర్మాణం, హైడ్రాలజీ తదితర సాంకేతిక అంశాలను కమిటీ పరిశీలించనుంది. అభ్యంతరాలు, సందేహాలను నీటిపారుదల శాఖ అధికారులను అడిగి నివృత్తి చేసుకోనుంది. టీఏసీ ఆమోదం లభిస్తే వాటి డీపీఆర్‌లు జల్‌శక్తి మంత్రిత్వశాఖకు చేరుతాయి. ఈ అంశంపై నీటిపారుదల శాఖ అధికారులు శుక్రవారం కూడా కసరత్తు చేయనున్నట్లు తెలిసింది.