‘టిటా’ లోగోను ఆవిష్కరించిన మంత్రి కేటీఆర్‌

 వచ్చే ఏడాది సింగపూర్‌లో అంతర్జాతీయ సదస్సు

హైదరాబాద్‌, న్యూస్‌టుడే: రాష్ట్ర ప్రభుత్వం, తెలంగాణ ఇన్ఫర్మేషన్‌ టెక్నాలజీ అసోసియేషన్‌ (టిటా) సంయుక్తంగా సింగపూర్‌లో నిర్వహించనున్న వరల్డ్‌ తెలంగాణ ఐటీ సదస్సు (డబ్ల్యూటీఐటీసీ) లోగోను రాష్ట్ర ఐటీ శాఖ మంత్రి కేటీఆర్‌ ఆవిష్కరించారు. ఆదివారం టీ హబ్‌లో జరిగిన ఆవిష్కరణ కార్యక్రమంలో మంత్రి మాట్లాడుతూ.. ఈ సదస్సు నిర్వహణ ద్వారా రాష్ట్రానికి పెట్టుబడులు వస్తాయని ఆశాభావం వ్యక్తం చేశారు. రాష్ట్రానికి ప్రయోజనం చేకూర్చే ఈ సదస్సులో సాంకేతిక రంగానికి చెందిన ఔత్సాహికులు పాల్గొనాలని సూచించారు. టిటా అధ్యక్షుడు సందీప్‌ కుమార్‌ మఖ్తల మాట్లాడుతూ.. టిటా దశాబ్ది వేడుకల్లో భాగంగా వచ్చే ఏప్రిల్‌లో తెలంగాణ ఐటీ నిపుణులు, ఆవిష్కర్తలు, పరిశోధకులతో సింగపూర్‌ వేదికగా ఈ సదస్సు నిర్వహిస్తున్నట్లు తెలిపారు. అగ్రిటెక్‌, ఫిన్‌టెక్‌, ఎడ్యుటెక్‌, హెల్త్‌టెక్‌ వంటి అంశాలపై దృష్టి సారించనున్నట్లు చెప్పారు. డ్రోన్‌ సాంకేతికత, ఆర్టిఫిషియల్‌ ఇంటెలిజెన్స్‌, రోబోటిక్స్‌, మెషిన్‌ లెర్నింగ్‌, భవిష్యత్తులో ఐటీ పరిశ్రమ తీరుతెన్నులు తదితర అంశాలను విశ్లేషిస్తారని చెప్పారు. టిటా రాష్ట్ర కార్యదర్శి వినయ్‌, సభ్యులు శ్రీనివాస్‌, శ్రావణి బాసరాజు, క్రాంతి, వైద్యనాథ్‌ పాల్గొన్నారు.