ఏఎంవీఐ ఉద్యోగ ప్రకటన ఇవ్వాలి

అభ్యర్థుల ఆందోళన

ఈనాడు, హైదరాబాద్‌: రాష్ట్రంలో సహాయ మోటారు వెహికిల్‌ ఇన్‌స్పెక్టర్‌(ఏఎంవీఐ) పోస్టులకు వెంటనే ప్రకటన విడుదల చేయాలని అభ్యర్థులు డిమాండ్‌ చేశారు. సాంకేతిక కారణాల పేరిట టీఎస్‌పీఎస్సీ ప్రకటన ఉపసంహరించుకుని నాలుగు నెలలు గడుస్తున్నా.. ప్రభుత్వం ఎలాంటి నిర్ణయం తీసుకోలేదని ఆరోపించారు. ఈ మేరకు సోమవారం కమిషన్‌ కార్యాలయం వద్ద ఏఎంవీఐ ఉద్యోగార్థులు ఆందోళన నిర్వహించారు. విద్యార్హతలపై కమిషన్‌ నుంచి రవాణాశాఖకు వచ్చిన లేఖపై ఆ శాఖ స్పష్టత ఇవ్వకపోవడంతో ఆందోళనకు గురవుతున్నామని వివరించారు. ప్రకటన ఆలస్యమవుతున్న కొద్దీ... కొందరు అభ్యర్థుల వయోపరిమితి దాటిపోతోందని ఆవేదన వ్యక్తంచేశారు.

సమస్యను పరిష్కరించండి..: హరీశ్‌రావు

ఏఎంవీఐ పోస్టులకు ఉద్యోగ ప్రకటన జారీ చేయాలని కోరుతూ అభ్యర్థులు ఆర్థిక మంత్రి హరీశ్‌రావును కలిసి విజ్ఞప్తి చేశారు. సమస్యను పరిష్కరించి.. అభ్యర్థులకు న్యాయం చేయాలని మంత్రి.. రవాణాశాఖ ముఖ్యకార్యదర్శిని ఆదేశించారు.