‘పోలవరం సర్వే’కు తేదీ ఖరారు చేయండి

ప్రాజెక్టు అథారిటీకి తెలంగాణ లేఖ

ఈనాడు, హైదరాబాద్‌: పోలవరం ప్రాజెక్టు ముంపు ప్రభావంపై ఉమ్మడి సర్వే నిర్వహించేందుకు తేదీ ఖరారు చేయాలంటూ పోలవరం ప్రాజెక్టు అథారిటీ(పీపీఏ)కి తెలంగాణ నీటిపారుదల శాఖ ఈఎన్‌సీ మురళీధర్‌ సోమవారం లేఖ రాశారు. ఈ నెల 16న హైదరాబాద్‌లో జరిగిన పీపీఏ సాధారణ సమావేశంలో ఉమ్మడి సర్వే చేపట్టాలని కోరినా.. స్పష్టత ఇవ్వలేదని ఆ లేఖలో పేర్కొన్నట్లు తెలిసింది. 12వ పీపీఏ సమావేశంలో ఉమ్మడి సర్వేకు ఏపీ అంగీకరించిందని పేర్కొన్నారు. ప్రాజెక్టు పూర్తిస్థాయి నీటిమట్టానికి చేరుకున్నప్పుడు భద్రాద్రి కొత్తగూడెం జిల్లాలో 892 ఎకరాలు ముంపునకు గురవుతున్నాయని, వరదల సమయంలో 40 వేల ఎకరాలకుపైగా పంటపొలాలు మునుగుతున్నాయని తెలిపారు. జాతీయ హరిత ట్రైబ్యునల్‌ ఆదేశాల మేరకు ఈ నెల 10న ప్రారంభించిన ఉమ్మడి సర్వే అర్ధంతరంగా ముగిసిందని ప్రస్తావించారు.