గూడ్స్‌ ఇంజిన్‌ నుంచి విడిపోయిన బోగీలు

కాసిపేట, తాండూరు- న్యూస్‌టుడే: బల్లార్ష నుంచి 30 బోగీలతో కాజీపేటకు బయలుదేరిన గూడ్స్‌ రైలు బోగీలు ఇంజిన్‌ నుంచి విడిపోయాయి. మంచిర్యాల జిల్లా తాండూరు మండల కేంద్రానికి సమీపంలో సోమవారం మధ్యాహ్నం 12.45 సమయంలో ఈ సంఘటన చోటుచేసుకుంది. ఇంజిన్‌ అలాగే దాదాపు 500 మీటర్ల వరకు ముందుకెళ్లింది. బోగీలు పట్టాలపై ఉన్న విషయాన్ని గమనించిన సిబ్బంది రైల్వే అధికారులకు సమాచారం ఇచ్చారు. దీంతో అధికారులు ఆ గూడ్సు రైలును రేచిని రైల్వే స్టేషనులో నిలిపి అక్కడి నుంచి ఇంజిన్‌ను వెనక్కి రప్పించారు. అనంతరం బోగీలను ఇంజినుకు కలిపి కాజీపేటకు పంపించారు.