గిరిజనులకు న్యాయం చేయండి

రాష్ట్రపతికి రామచంద్రుడు తేజావత్‌ వినతి

ఈనాడు, దిల్లీ: తెలంగాణలో పోడు భూముల అంశంలో గిరిజనులకు న్యాయం చేయాలని రాష్ట్రపతి ద్రౌపది ముర్మును రాష్ట్ర ప్రభుత్వ మాజీ ప్రత్యేక ప్రతినిధి రామచంద్రుడు తేజావత్‌ కోరారు. ఈ మేరకు గురువారం ఆయన దిల్లీలోని రాష్ట్రపతి భవన్‌లో రాష్ట్రపతిని కలిసి వినతిపత్రం అందజేశారు. ముందుగా రాష్ట్రపతిగా ఎన్నికైనందుకు ద్రౌపది ముర్ముకు రామచంద్రుడు పుష్పగుచ్ఛం అందజేసి అభినందించారు. చట్టసభలతో పాటు ఉన్నత న్యాయవ్యవస్థలో ఎస్సీ, ఎస్టీలకు రిజర్వేషన్లు కల్పించేలా చొరవ చూపాలని, గవర్నర్ల నియామకంలోనూ రిజర్వేషన్లు అమలుచేయాలని ఆమెకు విజ్ఞప్తి చేశారు. ఎస్సీ, ఎస్టీ విభాగాలకు చెందిన సివిల్‌ సర్వీసు అధికారులను వారి సొంత రాష్ట్రాలకు కేటాయించాలని కోరారు.