స్వచ్ఛ సర్వేక్షణ్‌లో సిరిసిల్లకు తొలిస్థానం

నాలుగు జిల్లాలకు ఫోర్‌స్టార్‌ రేటింగ్‌
త్రీస్టార్‌ కేటగిరీలో మూడు జిల్లాలు

ఈనాడు, హైదరాబాద్‌: స్వచ్ఛభారత్‌ మిషన్‌ (గ్రామీణ)లో భాగంగా నవంబరు నెలకు ఇచ్చిన సూచికల మేరకు ప్రగతిలో తెలంగాణ ముందు వరుసలో నిలిచింది. బహిరంగ విసర్జన నిర్మూలన (ఓడీఎఫ్‌) ప్లస్‌ కేటగిరీలో ఫోర్‌స్టార్‌ రేటింగ్‌ విభాగంలో రాజన్న సిరిసిల్ల జిల్లా దేశంలోనే తొలిస్థానం సాధించింది. గృహాల్లో మరుగుదొడ్లు నిర్మించుకుని వినియోగించడం, అన్ని సంస్థల్లో మరుగుదొడ్ల నిర్మాణం, గ్రామాల్లో ఘన వ్యర్థాల నిర్వహణ, కంపోస్టు షెడ్ల నిర్మాణం, గ్రామాల్లో మురుగునీటి నిర్వహణ, పరిశుభ్ర గ్రామాలుగా తీర్చిదిద్దడంతో పాటు వాల్‌ పెయింటింగ్‌ వేయడం ప్రమాణాలుగా ఈ సర్వే జరిగింది. నవంబరులో ఈ సర్వే ప్రకారం దేశవ్యాప్తంగా ఫోర్‌స్టార్‌ రేటింగ్‌ను ఆరు జిల్లాలు పొందితే అందులో నాలుగు జిల్లాలు తెలంగాణ నుంచి ఉన్నాయి. సిరిసిల్లతో పాటు కరీంనగర్‌ (4వ స్థానం) మేడ్చల్‌ (5వ స్థానం), పెద్దపల్లి (6వ స్థానం) జిల్లాలు ఈ జాబితాలో ఉన్నాయి. త్రీస్టార్‌ రేటింగ్‌ పొందిన తొలి పది జిల్లాల్లో మూడు తెలంగాణలో ఉన్నాయి. ఈ కేటగిరీలో జగిత్యాల జిల్లా 5వ ర్యాంకు, ఖమ్మంజిల్లా ఆరోర్యాంకు, సూర్యాపేట జిల్లా తొమ్మిదో ర్యాంకు సాధించాయి.