Electricity Bill: రీడింగ్‌ ఆలస్యమైతే ఇలా లెక్కిస్తారు: సీఎండీ

ఈనాడు, హైదరాబాద్‌: కరెంటు బిల్లుల జారీలో ఆలస్యంతో శ్లాబు మారిపోతుందనే ప్రచారంలో నిజం లేదని దక్షిణ తెలంగాణ విద్యుత్తు పంపిణీ సంస్థ(టీఎస్‌ఎస్పీడీసీఎల్‌) సీఎండీ జి.రఘుమారెడ్డి స్పష్టం చేశారు. దీనిపై సామాజిక మాధ్యమాల్లో కొందరు తప్పుడు ప్రచారం చేస్తున్నారని చెప్పారు. ఈ విషయంపై ఆయన ఓ ప్రకటన విడుదల చేశారు.

* ఉదాహరణకు ఒక వినియోగదారు 222 యూనిట్లు వాడారు. ఆ నెల ప్రకారం 31 రోజులకు బిల్లు చేయాలి. కానీ 35 రోజులకు రీడింగ్‌ తీశారు. అప్పుడు.. 222 యూనిట్లను 35 రోజులతో భాగిస్తే.. ఒక్కరోజులో కాల్చే యూనిట్ల సగటు 6.34 వస్తుంది. దీన్ని ఆ నెలలో మొత్తం రోజులు 31తో గుణిస్తే 197 యూనిట్లు వచ్చింది. 

* 200 యనిట్లలోపు ఉన్నందున ఆ ప్రకారమే బిల్లు ఇస్తారు. మామూలుగా అయితే 1 నుంచి 100 యూనిట్ల వరకు ఒక శ్లాబు, 101 నుంచి 200 వరకు మరో శ్లాబుగా ఉంటుంది. కానీ ఆలస్యం కారణంగా 200 యూనిట్లు దాటినందున పెరిగిన దామాషాలో 1 నుంచి 100 యూనిట్ల వరకు ఉన్న శ్లాబును పెంచుతారు. 222 యూనిట్ల ఉదాహరణలో 1 నుంచి 113 యూనిట్ల వరకు ఒకే రేటు ఉంటుంది. మిగిలిన యూనిట్లను రెండో శ్లాబులో పరిగణనలోకి తీసుకుంటారు.

* అంటే 1 నుంచి 113 యూనిట్ల వరకు రూ.3.80, 114 నుంచి 222 వరకు రూ.4.80 చొప్పున లెక్కించి బిల్లు తీస్తారు. 200 యూనిట్లు దాటినట్టుగా పరిగణించి 1 నుంచి 200 వరకు రూ.5.50 201 నుంచి 222 వరకు 7.20 చొప్పున లెక్కించరు.