మూసిన గనుల సమీపంలో కుంగిన భూమి

నిర్వహణకు నీళ్లొదిలిన నేపథ్యం
మంచిర్యాల జిల్లా బెల్లంపల్లిలో ఘటన
దరికి రావద్దంటూ సింగరేణి అధికారుల హెచ్చరికలు 

బెల్లంపల్లి పట్టణం, న్యూస్‌టుడే: మంచిర్యాల జిల్లా బెల్లంపల్లి పట్టణంలో సౌత్‌, క్రాస్‌కట్‌ భూగర్భ గనుల సమీపంలో సోమవారం రాత్రి సమయంలో భూమి ఒక్కసారిగా కుంగింది. ఎస్టేట్‌ సిబ్బంది మళ్లీ బోర్డు ఏర్పాటుచేసి సమీపానికి ప్రజలు రావద్దంటూ హెచ్చరికలు జారీ చేశారు. దాదాపుగా 47 ఏళ్ల క్రితం సింగరేణి ఆధ్వర్యంలోని సౌత్‌, క్రాస్‌కట్‌ భూగర్భ గనులను మూసివేశారు. 1995-96 వరకు క్రాస్‌కట్‌లో ఆరు పంపులతో నీళ్లు తోడి బయటకు పంపేలా చర్యలు తీసుకున్నారు. ఆ తర్వాత నిర్వహణను సింగరేణి సంస్థ గాలికి వదిలేయటంతో చుట్టూ అక్రమ నిర్మాణాలు పుట్టుకొచ్చాయి. గని లోపలికి వెళ్లే, బయటకు వచ్చే మార్గాలు తప్ప అంతా ఆక్రమణకు గురైంది. గత వర్షాకాలంలో  భారీవర్షాలకు ఈ ప్రాంతంలో నీళ్లు ప్రవాహంలా ఉబికి వచ్చాయి. ఆ సమయంలో సింగరేణి అధికారులు ప్రమాదం సూచించే బోర్డు ఏర్పాటుచేసి చేతులు దులుపుకొన్నారు. తాజాగా సోమవారం రాత్రి సమయంలో భూమి మళ్లీ ఒక్కసారిగా కుంగడంతో నీళ్లు పైకి కనిపిస్తున్నాయి.