కొత్త కంది వంగడం విడుదల

వరంగల్‌ వ్యవసాయం, న్యూస్‌టుడే: వరంగల్‌ ప్రాంతీయ వ్యవసాయ పరిశోధన కేంద్రం నుంచి మరో కొత్త కంది వంగడం విడుదలైంది. దీనిని రూపొందించేందుకు వరంగల్‌ శాస్త్రవేత్తలు ఆరేళ్ల పాటు కృషిచేశారు. 2021 యాసంగిలో పరిశోధనలు పూర్తి ఈ ఏడాది కంది వంగడాన్ని యాసంగిలో సాగు చేసుకునేందుకు విడుదల చేశారు. దీనికి వరంగల్‌ కంది-2 (డబ్ల్యూ ఆర్‌జీ-255) అని పేరు పెట్టారు. దీనికి సంబంధించిన వివరాలను బుధవారం వరంగల్‌ ప్రాంతీయ వ్యవసాయ పరిశోధన కేంద్రం ఏడీఆర్‌ డా.రావుల ఉమారెడ్డి వెల్లడించారు. పంటకాలం 170 నుంచి 180 రోజులని, 100 విత్తన గింజల బరువు 9 నుంచి 10 గ్రాములు ఉంటుందన్నారు. గింజ రకం మధ్యస్థ లావు, ఎరుపు రంగులో ఉంటుందని, ఏక పంటగా, అంతరపంటగా సాగు చేసుకోవచ్చని చెప్పారు. వానాకాలంలో నల్లరేగడి, బరువైన నేలల్లో సాగు చేసుకునేందుకు అనుకూలమన్నారు. వర్షాధారంగా సాగు చేస్తే ఎకరాకు 8 నుంచి 10 క్వింటాళ్లు, నీటి తడులతో సాగు చేస్తే ఎకరాకు 10 నుంచి 13 క్వింటాళ్ల దిగుబడి వస్తుందన్నారు. ఎండు తెగులును సమర్థంగా తట్టుకుంటుందని తెలిపారు. తెలంగాణ, ఆంధ్రప్రదేశ్‌ రాష్ట్రాలలోని వాతావరణం, సాగు నేలలకు అనుకూలంగా ఉంటుందన్నారు.