న్యాయమూర్తుల బదిలీలను నిలిపివేయాలి

ఏపీ హైకోర్టు వద్ద న్యాయవాదుల ర్యాలీ

ఈనాడు, అమరావతి: ఏపీ హైకోర్టు న్యాయమూర్తులు జస్టిస్‌ బట్టు దేవానంద్‌, జస్టిస్‌ డి.రమేశ్‌ల బదిలీ సిఫారసులను వ్యతిరేకిస్తూ న్యాయవాదులు హైకోర్టు వద్ద ర్యాలీ నిర్వహించారు. బదిలీలను తక్షణం నిలిపివేయాలని నినాదాలు చేశారు. వీటిపై సుప్రీంకోర్టు కొలీజియం పునరాలోచన చేయాలని కోరారు. న్యాయవ్యవస్థ స్వతంత్రతను కాపాడాలని నినదించారు. అడ్వొకేట్స్‌ ఐకాస కన్వీనర్లు వై.కోటేశ్వరరావు (వైకే), జడా శ్రావణ్‌కుమార్‌, డీఎస్‌ఎన్వీ ప్రసాదబాబు, జీవీ శివాజీ, వాసిరెడ్డి ప్రభునాథ్‌ ఆధ్వర్యంలో బుధవారం మధ్యాహ్నం భోజన విరామ సమయంలో హైకోర్టు వద్ద నిరసన కార్యక్రమం చేపట్టారు. అనంతరం ప్లకార్డులు ప్రదర్శిస్తూ క్యాంటిన్‌ వరకు ర్యాలీ నిర్వహించారు.