వేధిస్తుంటే క్రీడాకారులు రాణించేదెలా: ఎంపీ పాటిల్‌

ఈనాడు, దిల్లీ: దేశంలో క్రీడల్లో రాణిస్తున్న క్రీడాకారులను వేధించే ధోరణి పెరిగిపోతోందని తెరాస ఎంపీ బీబీ పాటిల్‌ విమర్శించారు. టోక్యో ఒలింపిక్స్‌లో కాంస్య పతకం సాధించిన ఓ బాక్సర్‌ను మానసిక వేధింపులకు గురిచేసిన విషయాన్ని మనం మర్చిపోకూడదన్నారు. క్రీడాభివృద్ధిపై లోక్‌సభలో గురువారం జరిగిన చర్చలో ఆయన మాట్లాడారు. క్రీడలపై కేంద్ర ప్రభుత్వంపై ఉదాసీనత వహించడం, మౌలిక వసతులు కల్పించకపోవడంతో క్రీడాకారులు అంతర్జాతీయ స్థాయిలో సరైన ప్రదర్శన చేయలేకపోతున్నారని ఆవేదన వ్యక్తం చేశారు. అన్ని రకాల క్రీడాకారులకు ప్రోత్సాహం ఇవ్వాలని సూచించారు. కామారెడ్డిలో ఖేలో ఇండియా కేంద్రాన్ని నెలకొల్పాలని ఆయన కోరారు.