గోడ కూలింది.. పరదాయే దిక్కయ్యింది!

న్యూస్‌టుడే, బీర్కూర్‌: కామారెడ్డి జిల్లా బీర్కూర్‌లోని మండల పరిషత్‌ ప్రాథమిక పాఠశాలలో దుస్థితి ఇది. 44 ఏళ్ల క్రితం నిర్మించిన ఈ పాఠశాలలో ప్రస్తుతం 106 మంది బాలికలు, 106 మంది బాలురు చదువుతున్నారు. ఆరుగురు ఉపాధ్యాయినులు, ఇద్దరు ఉపాధ్యాయులు పనిచేస్తున్నారు. ఇటీవల మూత్రశాల గోడ కూలడం,  పైన రేకులను దొంగలు ఎత్తుకెళ్లడంతో ఉపాధ్యాయులు ఆ ప్రాంతంలో పరదాలు కట్టారు. ఆ పరదాల చాటునే నిత్యం బాలికలు మూత్రవిసర్జనకు వెళ్లాల్సి వస్తోంది. ఇటీవల ఈ పాఠశాలను ‘మన ఊరు- మన బడి’ కింద ఎంపిక చేయడంతో అభివృద్ధి పనులకు రూ.6.78 లక్షలు విడుదలయ్యాయి. అత్యవసరంగా మరుగుదొడ్లు కట్టించండి అని స్థానికులు కోరగా అదనపు తరగతి గదుల నిర్మాణ పనులు చేపట్టడం కొసమెరుపు.