Manohari Gold Tea: కిలో టీపొడి.. రూ.1.50 లక్షలు

వేలంలో మనోహరి గోల్డ్‌ రకానికి రికార్డు ధర
కైవసం చేసుకున్న హైదరాబాదీ

అస్సాంలో మనోహరి గోల్డ్‌ టీ వేలంలో మరోసారి రికార్డుస్థాయి ధర పలికింది. హైదరాబాద్‌కు చెందిన ఓ ప్రముఖ వ్యాపారవేత్త ఈ టీ పొడిని కిలో రూ.1.50 లక్షలకు కొనుగోలు చేశారు. గతేడాది దీని ధర రూ.99,999 పలికింది. మన దేశంలో చాయ్‌కు ఉన్న క్రేజే వేరు. అందులోనూ అస్సాంలో పండే తేయాకుది ప్రత్యేక స్థానం. ఆ రాష్ట్రంలో ఏటా 65 కోట్ల కిలోలకు పైగా తేయాకు ఉత్పత్తవుతుంది. ఇది దేశంలోని మొత్తం ఉత్పత్తిలో 52 శాతం. ఏటా పలు సంస్థలు అరుదైన రకాలకు చెందిన టీ పొడులను వేలం వేస్తుంటాయి. శనివారం మనోహరి గోల్డ్‌ టీ పొడికి వేలం నిర్వహించారు. హైదరాబాద్‌కు చెందిన నీలోఫర్‌ కేఫ్‌ యజమాని కె.బాబూరావు రూ.1.50 లక్షలకు దీన్ని కొనుగోలు చేసినట్లు మనోహరి టీ ఎస్టేట్‌ యజమాని రాజన్‌ లోహియా వెల్లడించారు. వేకువజామున 4 నుంచి ఉదయం 6 గంటల ప్రాంతంలో టీ గార్డెన్‌లో ఒకే చెట్టుకు కాసిన మొగ్గ నుంచి సేకరించిన ఆకులతో ఈ టీ పొడిని తయారు చేస్తామని ఆయన తెలిపారు. మనోహరి గోల్డ్‌ టీ పొడితో తయారు చేసిన టీని రూ.1000కు కప్పు చొప్పున విక్రయిస్తామని బాబూరావు పేర్కొన్నారు.