కు.ని.శస్త్రచికిత్స చేయించుకున్న మహిళకు ఒక గ్రూప్‌ రక్తం బదులు మరొకటి

బాంబే బ్లడ్‌ గ్రూప్‌ కావడంతో హైదరాబాద్‌కు పరుగులు

కోరుట్ల, కరీంనగర్‌ సంక్షేమ విభాగం, న్యూస్‌టుడే: కోరుట్ల ఏరియా ఆసుపత్రిలో ఓ మహిళకు ఒక గ్రూపు రక్తం బదులు మరో గ్రూపుది ఎక్కించడంతో సమస్యలు తలెత్తాయి. బుధవారం ఆసుపత్రిలో అయిదుగురికి కుటుంబ నియంత్రణ  శస్త్రచికిత్సలు చేశారు. ఇందులో సిరిసిల్ల జిల్లా రుద్రంగికి చెందిన భూక్యా లత కూడా ఉన్నారు. గురువారం లతను పరీక్షించిన వైద్యులు రక్తం తక్కువగా ఉన్నట్లు గుర్తించి ఓ పాజిటివ్‌ బ్లడ్‌ ఎక్కించారు. వాంతులు చేసుకోవడంతో మధ్యలోనే నిలిపివేశారు. మరోసారి రక్తపరీక్ష చేయగా ఓ పాజిటివ్‌లో అరుదైన ‘బాంబే బ్లడ్‌ గ్రూప్‌’ అని తేలింది. వెంటనే వైద్యులు ఆమెను కరీంనగర్‌ ఆసుపత్రికి పంపించారు. అక్కడా బాంబే బ్లడ్‌ గ్రూప్‌  లభించలేదు. చివరకు హైదరాబాద్‌ నిమ్స్‌లో ఉందని తెలియడంతో వైద్యులు బాధిత బంధువులను అక్కడకు పంపించారు.