ఉమ్మడి జిల్లాలో సర్వీసుకు పాయింట్లు కేటాయించాలి

హైకోర్టు మధ్యంతర ఉత్తర్వులు

ఈనాడు, హైదరాబాద్‌: జిల్లాల పునర్విభజన నేపథ్యంలో జీవో 317 కింద కొత్త జిల్లాలకు కేటాయించిన ఉపాధ్యాయులకు బదిలీల్లో ఉమ్మడి జిల్లాలోని సర్వీసుకు పాయింట్లు కేటాయించాలంటూ హైకోర్టు సోమవారం మధ్యంతర ఉత్తర్వులిచ్చింది. ఉపాధ్యాయుల బదిలీకి సంబంధించి ప్రభుత్వం గత నెల 25న జారీచేసిన జీవో 5లోని నిబంధనను సవాలు చేస్తూ హైకోర్టులో పలువురు 53 పిటిషన్లు దాఖలు చేశారు. వీటిపై జస్టిస్‌ కె.శరత్‌ విచారణ చేపట్టారు. పిటిషనర్ల తరఫు న్యాయవాది ఎం.రాంగోపాల్‌రావు, డి.బాలకిషన్‌రావు తదితరులు వాదనలు వినిపిస్తూ బదిలీల నిమిత్తం జారీచేసిన జీవో 5లోని నిబంధన 5(3) ప్రకారం రెండేళ్ల సర్వీసు పూర్తిచేసినవారు బదిలీకి అర్హులని, కౌన్సెలింగ్‌ నిమిత్తం దరఖాస్తు చేసుకోవచ్చన్న నిబంధన చట్ట, రాజ్యాంగ విరుద్ధమన్నారు. జీవో 317 ప్రకారం కొత్త జిల్లాలకు కేటాయించినవారికి రెండేళ్ల సర్వీసు నిబంధన వర్తింపజేయడం సరికాదన్నారు. వాదనలను విన్న న్యాయమూర్తి కొత్త జిల్లాలకు కేటాయించిన ఉపాధ్యాయులకు పాత జిల్లాల్లో సర్వీసుకు పాయింట్లు కేటాయించి బదిలీలకు అవకాశం ఇవ్వాలంటూ మధ్యంతర ఉత్తర్వులు జారీ చేశారు.