పెద్దగట్టు జాతరలో ఘనంగా ‘చంద్రపట్నం’

ముగిసిన స్వామివారి కల్యాణ క్రతువు

ఈనాడు, నల్గొండ, న్యూస్‌టుడే, చివ్వెంల: సూర్యాపేట పురపాలిక పరిధి దురాజ్‌పల్లి లింగమంతుల స్వామి జాతరలో మూడోరోజైన మంగళవారం స్వామివారికి చంద్రపట్నం (పసుపు, కుంకుమలతో దేవరపెట్టె ముందు వేసే ముగ్గు) కార్యక్రమం వైభవంగా ముగిసింది. అనంతరం కల్యాణ క్రతువును హక్కుదారులైన యాదవ సోదరులు పూర్తి చేశారు. వరుడు లింగమంతుల స్వామి తరుఫున మెంతబోయిన వారు, వధువు మాణిక్యమ్మ తరఫున మున్న వంశీయులు కార్యక్రమంలో పాల్గొన్నారు. అనంతరం పోతరాజు, భైరవుల వేషధారణలో ఇరువర్గాలు సంప్రదాయ పద్ధతిలో కటారులను తిప్పి స్వామివారి ఆశీర్వాదం అందుకున్నారు. చంద్రపట్నం, కల్యాణ మహోత్సవంలో మంత్రి జగదీశ్‌రెడ్డి కుటుంబ సమేతంగా పాల్గొని మొక్కులు చెల్లించుకున్నారు. జాతరలో మూడోరోజు భక్తుల కోలాహలంతో క్షేత్రం సందడిగా మారింది.