రోజువారీ విద్యుత్‌ గరిష్ఠ డిమాండ్‌.. వచ్చే పదేళ్లలో 77 శాతం వృద్ధి!

జాతీయ విద్యుత్‌ ప్రణాళిక ముసాయిదా విడుదల

ఈనాడు, హైదరాబాద్‌: దేశంలో విద్యుత్‌ డిమాండ్‌, వినియోగం పెరుగుతున్నందున ఇంధన పొదుపుపై అందరూ దృష్టి పెట్టాలని జాతీయ విద్యుత్‌ ప్రణాళిక’ (ఎన్‌పీఎల్‌) ముసాయిదాలో కేంద్రం స్పష్టం చేసింది. 2022-32 మధ్యకాలంలో దేశ విద్యుత్‌ అవసరాల మేరకు చేపట్టాల్సిన చర్యలను వివరించింది. దీనిపై అభ్యంతరాలు, సూచనలను ఈ నెల 22లోగా పంపాలని ప్రజలకు, విద్యుత్‌ సంస్థలకు బుధవారం లేఖ రాసింది. ప్రస్తుతం దేశంలో ఒకరోజు గరిష్ఠ విద్యుత్‌ డిమాండ్‌ 2.05 లక్షల మెగావాట్లుండగా అది 2026-27 నాటికి 2.72 లక్షలు, 2031-32 నాటికి 3.63 లక్షల మెగావాట్లకు (ప్రస్తుత డిమాండ్‌ కంటే 77 శాతం అధికం) చేరుతుందని అంచనా.

* ప్రస్తుతం దేశంలో అన్ని రకాలు కలిపి 4 లక్షల మెగావాట్లకు పైగా స్థాపిత ఉత్పత్తి సామర్థ్యమున్న విద్యుత్కేంద్రాలున్నాయి. 1.65 లక్షల మె.వా. సామర్థ్యమున్న విద్యుత్కేంద్రాలు నిర్మాణంలో ఉన్నాయి. మొత్తంగా 2022-27 మధ్యకాలంలో 2,28,541 మె.వా, 2027-32 మధ్యకాలంలో మరో 2.43 లక్షల మె.వా, విద్యుత్కేంద్రాల నిర్మాణం పూర్తిచేయాలి. ఇందుకోసం రూ.14,30,718 కోట్లు పెట్టుబడులు పెట్టాలి. ఇందులో 75 శాతం రుణాలుగా తీసుకోవాలి.

* ఎన్నో ఏళ్లుగా విద్యుదుత్పత్తి చేస్తున్న 4,629 మె.వా. సామర్థ్యం గల 11 థర్మల్‌ కేంద్రాలు 2027 మార్చి నాటికి మూతపడనున్నాయి. అదే సమయానికి మరో 25,950 మె.వా. సామర్థ్యంతో నిర్మిస్తున్న 19 ప్లాంట్లు అందుబాటులోకి రానున్నాయి.

* తెలంగాణలోని దామరచర్ల వద్ద నిర్మిస్తున్న 4,000 మె.వా, యాదాద్రి, రామగుండంలో 1,600 మె.వా. ప్లాంటు కూడా త్వరలో ప్రారంభం కానున్నాయి.

* మూతపడేవాటిలో ఆంధ్రప్రదేశ్‌లోని నార్ల తాతారావు థర్మల్‌ విద్యుత్‌ కేంద్రం (ఎన్‌టీటీపీఎస్‌)లోని మొత్తం ఆరు ప్లాంట్ల కాలం తీరనుంది. వీటి సామర్థ్యం 1260 మె.వా. ఇదే ప్లాంటులో 5వ దశ కింద నిర్మిస్తున్న 800 మె.వా. ఉత్పత్తి 2026-27లోపు ప్రారంభం కానుంది.

* 2031-32 నాటికి దేశంలో 17,770 మె.వా. ఉత్పత్తి సామర్థ్యమున్న పంప్డ్‌ స్టోరేజీ విద్యుత్కేంద్రాలను నిర్మించాలి. వీటిలో 9,150 మె.వా. కేంద్రాలు ఏపీలోనే నిర్మిస్తారని అంచనా.

* ఏపీలోని పోలవరం ప్రాజెక్టు వద్ద 960 మె.వా. జలవిద్యుత్కేంద్రం కూడా పూర్తికానుంది.

* ఏపీలో 38,440, తెలంగాణలో 20,410 మెగావాట్ల సౌరవిద్యుదుత్పత్తి కేంద్రాల ఏర్పాటుకు అవకాశాలున్నాయి.

* దేశంలో విద్యుదుత్పత్తి వల్ల 2020-21లో 910 మిలియన్‌ టన్నుల (మి.ట) కర్బన ఉద్గారాలు వెలువడగా 2032 నాటికి 1180 మి.ట.లు వస్తాయని అంచనా.

* గత ఆర్థిక సంవత్సరం (2021-22) నాటికి మొత్తం దేశ విద్యుదుత్పత్తి 1492 బిలియన్‌ యూనిట్లలో సంప్రదాయేతర ఇంధనం వాటా 21.54 శాతముంది.

* దేశంలో మొత్తం 748 గిగావాట్ల సౌర విద్యుదుత్పత్తికి అవకాశాలున్నాయి.

* 2031-32 నాటికి దేశంలో సంప్రదాయేతర ఇంధన (ఆర్‌ఈ) కేంద్రాల స్థాపిత ఉత్పత్తి సామర్థ్యం 5.69 లక్షల మెగావాట్లకు చేరుతుందని అంచనా. అప్పటికి దేశంలోని మొత్తం విద్యుత్‌ డిమాండులో 45.09 శాతం దీని నుంచే రానుంది.

* 2022 మార్చి ఆఖరు నాటికి... తెలంగాణలో ఆర్‌ఈ కేంద్రాల స్థాపిత ఉత్పత్తి సామర్థ్యం 7439.12, ఏపీలో10,885.16 మెగావాట్లు ఉంది.

* ఆర్‌ఈ, థర్మల్‌ విద్యుత్‌ సరఫరాలో గ్రిడ్‌ నిర్వహణ సమర్థత కోసం బ్యాటరీ ఇంధన నిల్వ సదుపాయాలను పెంచాలి.