Basar: ఆన్‌లైన్‌లో సరస్వతీ అమ్మవారి పూజలు.. ఏప్రిల్‌ 1 నుంచి అందుబాటులోకి

ముథోల్‌(బాసర), న్యూస్‌టుడే: ప్రముఖ పుణ్యక్షేత్రమైన నిర్మల్‌ జిల్లాలోని బాసర సరస్వతీ అమ్మవారి ఆలయంలో ఆన్‌లైన్‌ పూజలు అందుబాటులోకి రానున్నాయి. రాష్ట్ర దేవదాయ శాఖ మంత్రి ఇంద్రకరణ్‌రెడ్డి చేతులమీదుగా ఆలయంలో మంగళవారం ప్రారంభమైన ఈ సేవలను ఏప్రిల్‌ 1వ తేదీ నుంచి అమలుపరచనున్నారు. పూజలు, రుసుం వివరాలను దేవాలయానికి సంబంధించిన వెబ్‌సైట్‌లో పొందుపరుస్తారు. విదేశీయులకు పోస్టల్‌ ఛార్జీలతో కలిపి రూ.2,516, స్థానికులకు రూ.1,516గా రుసుం నిర్ణయించారు. ఆసక్తి ఉన్న స్వదేశీ, విదేశీ భక్తులు ఆలయ వెబ్‌సైట్‌లో ఆన్‌లైన్‌ ద్వారా వివరాలు నమోదు చేసుకోవాల్సి ఉంటుంది. భక్తులు కోరుకున్న పూజలను వేదపండితులతో చేయిస్తారు. పూజల అనంతరం ప్రసాదం, ఇతర సామగ్రిని భక్తులు ఆన్‌లైన్‌లో పేర్కొన్న చిరునామాకు తపాలా సేవల ద్వారా పంపిస్తారు.