దిల్లీ చేరిన ఎమ్మెల్సీ కవిత

వెంట వెళ్లిన మంత్రి కేటీఆర్‌

ఈనాడు, దిల్లీ: భారాస ఎమ్మెల్సీ కవిత సోమవారం ఈడీ ముందు హాజరవుతారా? లేదా? అనే విషయమై ఉత్కంఠ నెలకొంది. మంత్రి కేటీఆర్‌, భర్త అనిల్‌, ఎంపీలు సంతోష్‌, వద్దిరాజు రవిచంద్ర, అదనపు అడ్వకేట్‌ జనరల్‌ రామచంద్రరావులతో కలిసి ఆమె ప్రత్యేక విమానంలో ఆదివారం సాయంత్రం హైదరాబాద్‌ నుంచి దిల్లీ చేరుకున్నారు. కవిత ఈ నెల 16వ తేదీన ఈడీ ముందు హాజరుకావాల్సి ఉన్నా తన ప్రతినిధిని మాత్రమే పంపారు. తాను దాఖలు చేసిన పిటిషన్‌ను ఈ నెల 24న సుప్రీంకోర్టు విచారించనుందని, న్యాయస్థానం తదుపరి ఉత్తర్వులు జారీచేసేవరకు వేచిచూడాలని ఆమె ఈ నెల 16న లేఖ ద్వారా ఈడీకి విజ్ఞప్తి చేశారు. కానీ ఈడీ 20వ తేదీన హాజరుకావాలని ఆమెకు మరోసారి సమన్లు జారీచేసింది. ఈ నేపథ్యంలో ఆమె గతంలో తాను రాసిన లేఖకే కట్టుబడి ఉంటారా? లేదంటే ఈడీ ముందు హాజరవుతారా? అన్న ప్రశ్న వ్యక్తమవుతోంది. ఆమె హాజరైతే ప్రస్తుతం ఈడీ కస్టడీలో ఉన్న దిల్లీ మాజీ ఉపముఖ్యమంత్రి మనీశ్‌ సిసోదియా, అరుణ్‌ రామచంద్రపిళ్లైలతో కలిపి విచారిస్తారని ప్రచారం జరుగుతోంది.