తెలంగాణ ఉద్యోగులకు దేశంలోనే అత్యధిక వేతనాలు

సెర్ప్‌ ఉద్యోగులతో ఎమ్మెల్సీ కల్వకుంట్ల కవిత

ఈనాడు, హైదరాబాద్‌: దేశంలోనే తెలంగాణ ప్రభుత్వం ఉద్యోగులకు అత్యధిక వేతనాలను ఇస్తోందని ఎమ్మెల్సీ కల్వకుంట్ల కవిత అన్నారు. గ్రామీణ పేదరిక నిర్మూలన సంస్థ(సెర్ప్‌) ఉద్యోగుల దీర్ఘకాలిక ఆకాంక్షను సీఎం కేసీఆర్‌ నెరవేర్చినందున వారు మరింత అంకితభావంతో పనిచేయాలని ఆమె సూచించారు. కొత్త పేస్కేల్‌ అమలుకు ఉత్తర్వుల జారీ చేయడంపై సెర్ప్‌ ఉద్యోగుల సంఘం రాష్ట్ర అధ్యక్షుడు కుంట గంగాధర్‌రెడ్డి, ఇతర ప్రతినిధులు ఆదివారం కవితను ఆమె నివాసంలో కలిసి కృతజ్ఞతలు చెప్పారు. కవిత వారికి మిఠాయిలు తినిపించి శుభాకాంక్షలు తెలిపారు. సెర్ప్‌ ఉద్యోగులు రాష్ట్ర అభివృద్ధిలో కీలకపాత్ర పోషించాలని, గ్రామీణ ప్రాంతాల ప్రజలకు చేయూతనివ్వాలని కోరారు. సెర్ప్‌ జిల్లాల ఉద్యోగ సంఘాల నేతలు మంత్రులు నిరంజన్‌రెడ్డి, శ్రీనివాస్‌గౌడ్‌లను వారి నివాసాల్లో కలిసి ధన్యవాదాలు తెలిపారు. కాగా మంత్రి ఎర్రబెల్లి దయాకర్‌రావు ఆదివారం దేవరుప్పులలో సెర్ప్‌ ఉద్యోగులతో కలిసి సీఎం చిత్రపటానికి పాలాభిషేకం చేశారు.