సాగు భూముల క్రయవిక్రయాలతో ఖజానా గలగల

ఈ నెలాఖరుకు రూ.2 వేల కోట్లు దాటనున్న ఆదాయం

ఈనాడు, హైదరాబాద్‌: సాగు భూముల క్రయవిక్రయాల ద్వారా ప్రభుత్వ ఖజానాకు రాబడి మెరుగ్గా ఉంది. గురువారం నాటికి ఈ ఆదాయం రూ.1970 కోట్లకు చేరుకోగా, ఈ నెలాఖరు నాటికి రూ.2 వేల కోట్లు దాటనుందని అంచనా వేస్తున్నారు. రాష్ట్రంలో 2020 నవంబరు 2 నుంచి ధరణి పోర్టల్‌ ద్వారా సాగు భూముల రిజిస్ట్రేషన్లు, మ్యుటేషన్లు, భాగపంపిణీ, గిఫ్ట్‌ డీడ్‌, ఫౌతీ (వారసత్వ బదిలీ) తదితర సేవలు నిర్వహిస్తున్నారు. తహసీల్దారు - సంయుక్త సబ్‌రిజిస్ట్రార్‌ కార్యాలయాల్లో ఈ సేవలు అందుతున్నాయి. అంతకుముందు స్టాంపులు రిజిస్ట్రేషన్ల శాఖ (కార్డ్‌) ఆధ్వర్యంలో సబ్‌రిజిస్ట్రార్‌ కార్యాలయాల ద్వారా ఈ సేవలు అందేవి.

8.86 లక్షల లావాదేవీలు..

వ్యవసాయ భూములకు సంబంధించి 2021-22లో 8.32 లక్షల లావాదేవీల ద్వారా రూ.1760.55 కోట్ల నికర రాబడి రాగా.. ఈ ఆర్థిక సంవత్సరంలో గురువారం నాటికి 8.88 లక్షల లావాదేవీల ద్వారా రూ.1970 కోట్ల ఆదాయం వచ్చింది. వీటిలో రిజిస్ట్రేషన్లు-మ్యుటేషన్లు 7.23 లక్షలు, వారసత్వ బదిలీ 92,125, భాగపంపిణీ 14,420, వ్యవసాయ భూములను వ్యవసాయేతర భూములుగా మార్పిడి (నాలా) లావాదేవీలు 57,038 ఉన్నాయి. రంగారెడ్డి, మేడ్చల్‌ మల్కాజిగిరి, వికారాబాద్‌, సంగారెడ్డి, మెదక్‌, కరీంనగర్‌, ఖమ్మం తదితర జిల్లాలు రాబడిలో ముందున్నాయి.