పరిపాలనలో నవీన సాంకేతికత

తెలంగాణకు కంప్యూటర్‌ సొసైటీ ఆఫ్‌ ఇండియా అవార్డు
టీచిట్స్‌ ప్రాజెక్టుకు ప్రత్యేక పురస్కారం

ఈనాడు, హైదరాబాద్‌: పరిపాలనలో నవీన సాంకేతికతల వినియోగానికి గాను ఉత్తమ ప్రతిభా రాష్ట్రంగా తెలంగాణ.. కంప్యూటర్‌ సొసైటీ ఆఫ్‌ ఇండియా జాతీయ అవార్డుకు ఎంపికైంది. టీచిట్స్‌ పేరిట రూపొందించిన ప్రాజెక్టుకు ప్రత్యేక ప్రశంస పురస్కారం లభించింది. శనివారం దిల్లీలోని సాంకేతిక విశ్వవిద్యాలయంలో జరిగిన కార్యక్రమంలో రాష్ట్ర నవీన సాంకేతికతల విభాగం సంచాలకురాలు ఎల్‌.రమాదేవి, ఐటీ విభాగాధిపతి రుషితలకు నిర్వాహకులు ప్రదానం చేశారు. రాష్ట్రానికి ప్రతిష్ఠాత్మక పురస్కారాలు దక్కడంపై రాష్ట్ర మంత్రి కేటీఆర్‌ హర్షం వ్యక్తంచేశారు. ‘‘పరిపాలనలో ప్రజలకు సత్వర సేవలందించేందుకు నవీన సాంకేతికతల వినియోగం కోసం ప్రత్యేక విభాగాన్ని ఏర్పాటుచేశాం. దీనిద్వారా పౌరసేవలు మెరుగుపడ్డాయి. చిట్‌ఫండ్‌ సంస్థల సేవల క్రమబద్ధీకరణ, పారదర్శకత కోసం రాష్ట్ర స్టాంపులు, రిజిస్ట్రేషన్లశాఖ ద్వారా టీచిట్స్‌ పేరిట ప్రాజెక్టును అమలుచేస్తున్నాం. దీనికి ప్రత్యేక పురస్కారం లభించడం ఆనందంగా ఉంది. వివిధ రంగాల్లో అత్యాధునిక సాంకేతికతల వినియోగంలో రాష్ట్రప్రభుత్వం ముందుంది’’ అని మంత్రి తెలిపారు. రాష్ట్రానికి పురస్కారాలు దక్కడంపై పరిశ్రమలు, ఐటీశాఖల ముఖ్యకార్యదర్శి జయేశ్‌రంజన్‌ కూడా హర్షం వ్యక్తం చేశారు.