జాతీయ రహదారి-163జీకి రూ.2,235.08 కోట్లు: కేంద్ర మంత్రి గడ్కరీ

ఈనాడు, దిల్లీ: వరంగల్‌, మహబూబాబాద్‌, ఖమ్మం జిల్లాలను కలుపుతూ నాలుగు వరుసలతో నిర్మించనున్న జాతీయ రహదారి-163జీకి రూ.2,235.08 కోట్లను కేంద్ర ప్రభుత్వం కేటాయించింది. ఇందులో మహబూబాబాద్‌ జిల్లా తాళ్ల సంకీస నుంచి ఖమ్మం జిల్లా వి.వెంకటాయపాలెం మధ్య నాలుగు వరుసల యాక్సెస్‌ కంట్రోల్డ్‌ గ్రీన్‌ఫీల్డ్‌ రహదారి (ఎన్‌హెచ్‌-163జీ) నిర్మాణానికి రూ.1123.32 కోట్లు మంజూరు చేసినట్లు జాతీయ రహదారుల శాఖ మంత్రి నితిన్‌ గడ్కరీ ట్వీట్‌ చేశారు. 30.830 కిలోమీటర్ల ఈ రహదారి నిర్మాణాన్ని హైబ్రిడ్‌ యాన్యుటీ మోడల్‌లో చేపట్టనున్నట్లు పేర్కొన్నారు. ఇదే రహదారి కొనసాగింపుగా వరంగల్‌ జిల్లా వెంకటాపూర్‌ నుంచి మహబూబాబాద్‌ జిల్లా తాళ్ల సంకీస వరకు 39.410 కిలోమీటర్ల మేర నిర్మాణానికి రూ.1111.76 కోట్లకు ఆమోదం తెలిపినట్లు మంత్రి వివరించారు.