TS Eamcet: ఎంసెట్‌ దరఖాస్తుకు మిగిలింది నాలుగు రోజులే

ప్రతి వంద మందిలో ముగ్గురు ఆలస్య రుసుంతోనే..

ఈనాడు, హైదరాబాద్‌: ఎంసెట్‌కు ప్రతి 100 మందిలో ముగ్గురు ఆలస్య రుసుంతోనే దరఖాస్తు చేసుకున్నారు. రూ.250 నుంచి రూ.5 వేల వరకు అదనంగా చెల్లిస్తుండటం గమనార్హం. రూ.5 వేలతో ఇప్పటివరకు 59 మంది దరఖాస్తు చేసుకున్నారు. ఇప్పటివరకు మొత్తం 8,394 మంది ఆలస్య రుసుంతో పరీక్ష రాయడానికి ముందుకొచ్చారు. మే 10 నుంచి 15 వరకు ఎంసెట్‌ అగ్రికల్చర్‌, ఇంజినీరింగ్‌ పరీక్షలు జరగనున్నాయి. దరఖాస్తు చేసుకోవడానికి ఈ నెల 10నే గడువు ముగియగా.. మే 2 వరకు అపరాధ రుసుముతో అవకాశం ఉంది. శుక్రవారం వరకు మొత్తం 3,19,947 మంది దరఖాస్తు చేసుకున్నారని ఎంసెట్‌ కోకన్వీనర్‌ ఆచార్య విజయకుమార్‌రెడ్డి తెలిపారు. వారిలో ఇంజినీరింగ్‌, అగ్రికల్చర్‌ రెండు పరీక్షలూ రాసేవారు 372 మంది ఉన్నారు. ఇంజినీరింగ్‌కు హాజరయ్యే 1,53,676 మందిలో 1.08 లక్షల మంది హైదరాబాద్‌లోనే పరీక్ష రాయనున్నారు. అగ్రికల్చర్‌లోనూ 94,470 మందికి గాను 63,730 మంది నగరంలోనే హాజరవనున్నారు.