గిరిజనుల సమస్యలను ప్రాధాన్య అంశంగా పరిష్కరించాలి: తమిళిసై

రాజ్‌భవన్‌లో గవర్నర్‌తో జాతీయ ఎస్టీ కమిషన్‌ ఛైర్మన్‌ భేటీ

ఈనాడు, హైదరాబాద్‌: ఏళ్లుగా అభివృద్ధిలో వెనుకబాటుకు గురవుతున్న ఆదివాసీ గిరిజనుల సమస్యలను ప్రాధాన్య ప్రాతిపదికన పరిష్కరించాలని గవర్నర్‌ తమిళిసై సూచించారు. వివిధ స్థాయుల్లోని పరిపాలనాధికారులు గిరిజనులపై సానుభూతితో వ్యవహరించాలని.. ఫిర్యాదులను పరిష్కరించేందుకు కృషి చేయాలని కోరారు. జాతీయ ఎస్టీ కమిషన్‌ ఛైర్మన్‌ హర్ష చౌహాన్‌, సభ్యుడు ఆనంద్‌ నాయక్‌లు శుక్రవారం రాజ్‌భవన్‌లో గవర్నర్‌ తమిళిసైతో భేటీ అయ్యారు. ఈ సందర్భంగా భద్రాద్రి కొత్తగూడెం జిల్లాకు చెందిన పలువురు ఆదివాసీ గిరిజనుల ప్రతినిధులు జాతీయ ఎస్టీ కమిషన్‌ ఛైర్మన్‌కు తమ సమస్యలను వివరించారు. స్థానిక గిరిజన జాతరలకు నిధులు పెంచాలని.. గిరిజన విశ్వవిద్యాలయం ఏర్పాటు చేయాలని, భూమి పట్టాలు పంపిణీ జరిగేలా చూడాలని ఆదివాసీ సంఘాల ప్రతినిధులు గవర్నర్‌కు, ఎస్టీ కమిషన్‌కు విజ్ఞప్తి చేశారు. తమిళిసై మాట్లాడుతూ.. భద్రాద్రి కొత్తగూడెం జిల్లాలో 200 పడకల ఆధునిక ఆసుపత్రిని ఏర్పాటు చేయాలని గిరిజనులు కోరుతున్నారని ప్రస్తావించారు. హర్ష్‌ చౌహాన్‌ మాట్లాడుతూ.. స్థానిక భాషలో పాఠ్యపుస్తకాలను సిద్ధం చేయడానికి చర్యలు ప్రారంభించాలని కేంద్ర, రాష్ట్ర ప్రభుత్వాలకు సలహా ఇవ్వనున్నట్లు తెలిపారు.