తెలంగాణ వర్సిటీలో మళ్లీ ‘రిజిస్ట్రార్‌’ వివాదం

ఇన్‌ఛార్జిగా కనకయ్యను నియమించిన వీసీ రవీందర్‌

న్యూస్‌టుడే, తెవివి క్యాంపస్‌ : తెలంగాణ విశ్వవిద్యాలయంలో రిజిస్ట్రార్‌ నియామకంపై కొనసాగుతున్న వివాదం మళ్లీ మొదటికొచ్చింది. వైస్‌ ఛాన్స్‌లర్‌(వీసీ), పాలకమండలి(ఈసీ) మధ్య ఉన్న విభేదాలు రోజుకో మలుపు తిరుగుతున్నాయి. గత 20 నెలల కాల వ్యవధిలో ఆరుగురు రిజిస్ట్రార్లు మారారంటే వర్సిటీలో వివాదం ఏ స్థాయిలో ఉందో అర్థం చేసుకోవచ్చు. తాజాగా వర్సిటీలోని సీనియర్‌ ఆచార్యులు కనకయ్యకి ఇన్‌ఛార్జి బాధ్యతలు అప్పగిస్తూ శుక్రవారం వీసీ ఆచార్య రవీందర్‌ ఉత్తర్వులిచ్చారు. పాలకమండలి గతంలో నియమించిన ఆచార్య యాదగిరే రిజిస్ట్రార్‌గా కొనసాగుతారంటూ గురువారం హైదరాబాద్‌లోని సచివాలయంలో జరిగిన భేటీలో ఈసీ సభ్యులు మరోసారి తీర్మానించారు. యాదగిరికి రిజిస్ట్రార్‌గా ఆర్డర్‌ లేనందున నియామకం చెల్లదంటూ మొదటి నుంచి వీసీ వ్యతిరేకిస్తూ వస్తున్నారు. ఈ వివాదంతో ఎవరిని డ్రాయింగ్‌ అధికారిగా గుర్తించాలో తెలియక వర్సిటీలోని అధికారులు తర్జనభర్జన పడుతున్నారు.