వీఆర్‌ఏల క్రమబద్ధీకరణకు అవాంతరాలు

జిల్లాల నుంచి అందిన సమాచారంలో లోపాలు  

ఈనాడు, హైదరాబాద్‌: గ్రామ రెవెన్యూ అధికారుల(వీఆర్‌ఏ) క్రమబద్ధీకరణ ప్రక్రియకు అవాంతరాలు ఏర్పడినట్లు తెలుస్తోంది. ఈ నెల 18న రాష్ట్ర మంత్రివర్గం క్రమబద్ధీకరణకు నిర్ణయం తీసుకుని, అన్ని జిల్లాల నుంచి వీఆర్‌ఏల సమగ్ర సమాచారాన్ని క్రోడీకరించాలని రెవెన్యూశాఖను ఆదేశించింది. అయితే చాలా జిల్లాల్లో గౌరవ వేతనంపై విధులు నిర్వర్తిస్తున్న వారి సమాచారం అస్తవ్యస్తంగా ఉన్నట్లు గుర్తించారు. దానిని సరిచేసి ఈ నెల 25 వరకు సీసీఎల్‌ఏ సూచించిన నమూనా ప్రకారం పంపాలని జిల్లా కలెక్టర్లు తహసీల్దార్లకు ఆదేశించారు. అయినప్పటికీ రికార్డుల నిర్వహణలో లోపాలు, కొన్నిచోట్ల వీఆర్‌ఏలు వంతుల వారీగా పనిచేస్తుండటం, మరణించిన వారి స్థానాల్లో ప్రత్యామ్నాయంగా నియామకాలు చేపట్టకపోవడంతోపాటు మృతుల రికార్డే కొనసాగుతుండటం లాంటి సమస్యలు వెలుగు చూశాయి. ఇవన్నీ రికార్డుల్లో కొనసాగడంతో వాటిని సరిచేయడానికి ఎక్కువ సమయం పడుతుందని భావిస్తున్నారు. ఉమ్మడి వరంగల్‌, రంగారెడ్డి, మెదక్‌ జిల్లాల్లోని కొన్ని రెవెన్యూ డివిజన్లలో రికార్డులు సిద్ధం చేయడంలో జాప్యం జరిగినట్లు తెలుస్తోంది. క్షేత్రస్థాయి సమాచారం క్రోడీకరణ పూర్తయినా.. విద్యార్హతలు, వారసత్వ బదిలీకి ఉన్న అనుకూలతలు, న్యాయపరమైన చిక్కులు వంటివి గుర్తించే ప్రక్రియ చేపట్టాల్సి ఉంది.