మేలో ద.మ.రైల్వేకు రికార్డుస్థాయి ఆదాయం

ఈనాడు, హైదరాబాద్‌: వేసవి రద్దీ నేపథ్యంలో దక్షిణ మధ్య రైల్వే మే నెలలో అటు ప్రయాణికులు.. ఇటు సరకు రవాణాలో రికార్డుస్థాయి ఆదాయాన్ని నమోదు చేసింది. మొత్తం 2.12 కోట్ల మంది ప్రయాణికుల్ని గమ్యస్థానాలకు చేర్చడం ద్వారా రూ.513.41 కోట్లు ఆర్జించింది. 538 ట్రిప్పుల ప్రత్యేక రైళ్లతో అదనంగా 4.65 లక్షల మంది ప్రయాణించారు. ఇప్పటివరకు 2022 ఏప్రిల్‌లో వచ్చిన రూ.467.82 కోట్లే అత్యధిక ఆదాయంగా ఉంది. సరకు రవాణాలో 12.517 మిలియన్‌ టన్నులు రవాణా చేసి రూ.1,236.36 కోట్లు గడించింది. ఇప్పటివరకు 2023 మార్చిలో 12.370 మిలియన్‌ టన్నుల సరకు రవాణాతో ఆర్జించిన రూ.1,065.15 కోట్లే నెలవారీ ఆదాయంలో రికార్డుగా ఉంది.