డీఏ సరే.. వేతన సవరణ ఏది?

ఆర్టీసీ నిర్ణయంపై సంఘాల ఆగ్రహం

ఈనాడు, హైదరాబాద్‌: ఆర్టీసీ యాజమాన్యం కార్మికులకు వేతన సవరణ చేయకుండా డీఏ ప్రకటించడం పట్ల ఎంప్లాయీస్‌ యూనియన్‌ రాష్ట్ర కార్యదర్శి రాజిరెడ్డి తీవ్ర అసంతృప్తి వ్యక్తం చేశారు. ‘తాజాది కలిపి ఏడు డీఏలకు బకాయిలు ప్రకటించకపోవడంతో ప్రతి కార్మికుడు రూ.లక్షల్లో నష్టపోయారు’ అని గురువారం ఒక ప్రకటనలో ఆందోళన వ్యక్తం చేశారు. ‘2017, 2021 వేతన సవరణలు చేయలేదు. అలవెన్సులూ పెంచలేదు. 2019 జులై 1 నుంచి డీఏ బకాయిలూ చెల్లించలేదు. ఇప్పుడు నామమాత్రంగా ఒక్క డీఏ ప్రకటిస్తారా?’ అని ఆర్టీసీ బోర్డు మాజీ డైరెక్టర్‌ ఎం.నాగేశ్వరరావు ఆగ్రహం వ్యక్తం చేశారు.