రేషన్‌ స్టాక్‌ ఎక్కడుందో ఇట్టే తెలుసుకోవచ్చు!

ఈనాడు, హైదరాబాద్‌: రేషన్‌ దుకాణాల వద్ద లబ్ధిదారులు ఇక పడిగాపులు కాయనక్కర్లేదని.. స్టాక్‌ ఏ దుకాణంలో ఉంటే అక్కడికి వెళ్లి బియ్యం తీసుకోవచ్చని పౌరసరఫరాల శాఖ అధికారులు చెబుతున్నారు. పోర్టబులిటీ, పాత స్టాక్‌ అయిపోవడం, కొత్త స్టాక్‌ రావడంలో ఆలస్యం కారణంగా కొన్ని రేషన్‌ దుకాణాలను కొద్ది రోజులే తెరిచి.. ఆ తర్వాత మూసేస్తున్నారు. దీంతో లబ్ధిదారులు ఆందోళనకు దిగుతున్న సందర్భాలున్నాయి. ఈ నేపథ్యంలో పౌరసరఫరాల శాఖ వెబ్‌సైట్‌  https://epos.telangana.gov.in/ePoS/closingBalance_Report.html లో పొందుపరిచిన సమాచారం ఆధారంగా ఏ దుకాణానికి వెళ్లయినా లబ్ధిదారులు రేషన్‌ పొందొచ్చని అధికారులు సూచిస్తున్నారు.  వెబ్‌సైట్‌ లింక్‌లో లబ్ధిదారులు జిల్లా, సర్కిల్‌ వివరాల ఆధారంగా.. తమ రేషన్‌ దుకాణం నంబరు వెతికి స్టాక్‌ను గమనించొచ్చు. ఇతర దుకాణాల వివరాల కోసం హెల్ప్‌లైన్‌ నంబర్‌కు ఫోన్‌ చేస్తే  వివరాలు అందిస్తారని అధికారులు తెలిపారు.